有銀行界「梁朝偉」之稱嘅王冬勝，今年又做銀行公會主席，風頭再現，竟然講退休。話說佢噚日出席理柏基金經理年獎午餐會，做主講嘉賓，大談銀行業嘅發展同埋面對嘅挑戰。佢話內地銀行嘅發展，對本港銀行業帶來商機，但本地銀行亦要面對成本上升、信貸風險及人才等問題。
講到呢度，Peter突然話，銀行業經營唔容易，都係等啲後生仔去衝鋒陷陣。
呢句有感而發嘅說話引起台下有人問Peter：「咁你有乜忠告畀年輕賓架？」Peter話最緊要向啲好賓架學習！莫非佢想開班授徒？查實Peter今年55歲，照計冇咁快唔撈，散會後華華捉住問佢係咪諗住退休？Peter話冇咁快，要做到60歲。咁佢先頭講嘅說話，有冇玄機？
講開王冬勝，佢舊舖渣打銀行駐上海嘅資深經濟學家王志浩（StephenGreen，英文名同滙控大班葛霖一樣），農曆年期間去咗寧夏考察，最近發表咗一份報告，從寧夏補貼農村嘅模式看中國經濟發展，佢擔心補貼缺乏效益，未能扶助農村經濟，不過政治上又有需要。畢竟中國經濟係一門唔簡單嘅學問，唔怪得王冬勝都叫年輕賓架多多學習。
李華華