近排樓市氣氛好番啲，買家入市速度都爽快咗，市場連續錄得幾宗快閃買賣，最快嗰單，個客睇樓唔使一粒鐘，買咗件三百幾萬嘅東涌映灣園。
呢個買家係同屋苑租客，住咗超過一年，鍾意屋苑環境同設施，又篤信風水，認為屋苑嘅H室，啱晒佢嘅要求，睇樓時都指定要搵呢類單位，結果睇中六座中層一千二百零一呎，三房連套房單位，成交價三百五十五萬，呎價唔使三千。
買家係上車客，但一出手就買三百幾萬貨，美聯高級營業經理陳偉平表示，個客喺銀行做，認為息率會見頂，後市看漲，所以嗱嗱聲入市。
而另一單係屯門區換樓客，部署咗半年，見近期氣氛好轉，睇中邁亞美海灣四座頂層複式，一千零四十五呎單位，睇樓期間得悉有幾個準買家都想買，為免夜長夢多，出價三百二十七萬八打低對手，以略高於市價，喺兩個鐘內敲定。
美聯分行經理陳世豪話，邁亞美海灣只得二十八個複式，一千零四至一千四百八十一呎，所以一有放盤，市場都反應熱烈。
除私樓外，連居屋都一樣有極速成交，大圍嘉田苑嘉康閣高層八室，面積六百零五呎，自由市場（連補地價）成交價一百二十二萬，中原高級分行經理司徒永權表示，買家係換樓客，睇樓到成交只係用咗五個鐘。
電郵地址：[email protected]