中信泰富暗盤標售長沙灣商住地，噚日截標，聽聞有五份標書，最高標價都接近意向價，有機會賣出，七日後揭盅。
呢幅通州街五百至五○二號地皮，三萬五千呎，已有批文起兩幢四十三層高住宅，三百幾個單位，同埋一個四萬幾呎商場，總共大約三十二萬呎。
市傳喺西九龍有唔少發展項目嘅長實，一早就有斟過，出價超過十億，但係同業主要求嘅十二億，樓面地價三千七、八有啲距離，中信泰富就搵戴德梁行做吓招標，邀請一啲較有實力嘅發展商入標。
據悉新地、南豐、華置、嘉華冇入標。除咗長實，估計恒基、新世界同信和都有啲興趣。
有發展商話個盤地樁已打好，批晒則，可以好快賣樓套現，不過有人嫌個商場過大，計唔掂數。
新地亦都冇興趣，估計係因為佢同嘉里、華潤喺隔籬有個大幾倍嘅發展項目，即係潤發倉同嘉里鴻基貨倉重建，𠵱家傾緊補地價，如果中信泰富個地盤高價成交，佢哋係最大輸家，所以唔投都好合理。