香港人有時候真係好難做，一個唔覺意就會好容易俾公關同廣告瞞天過海。噚日有間發鈔銀行，為新造樓按推出「首三年同業拆息」計劃，仲要冇罰息期！利世民一見到個標題當堂眼都大埋，問︰「真係咁筍？」睇真啲先至發覺原來係要收每年1%手續費。話說呢間銀行之前都已經推出過「首三年同業拆息加1%」嘅樓按，今次只不過將「加1%」變做手續費，舊酒新瓶冇乜意思。
雖然細節中有魔鬼，不過如果各位相信息口就嚟要見頂，都可以考慮吓呢類計劃，因為拆息上落都比最優惠利率嘅改變快，減息期間呢類計劃有好大吸引力。話說回頭，同業拆息等於銀行資金成本價，銀行用拆息加些少借出樓按，可見銀行嚴重水浸，所以就有呢次減價搶客戰。
水浸銀行另一個現象，就係乜嘢新股上市都離晒譜地超額認購，當個市發展成呢種局面，大家投資者就要開始小心，因為歷史教訓我哋，呢啲亢奮完結嘅時候會好痛苦。到時候就有人搬出天方夜譚，又話資金流出又話大鱷玩嘢，其實邊有咁多陰謀論呢？一句到尾，物極必反係自然定律，各位小心為上！
樓市仍有隱憂
究竟香港經濟係唔係仲有其他問題？話說回歸之前，當時銀行水浸，加埋中英聯合聲明限制土地供應，樓價自然水漲船高。回歸之後頭幾年，八萬五加上聯儲局收油，香港樓市就好似海嘯之後，一片頹垣敗瓦景象。之後政府停止賣地，搞到庫房收入大減，結果要加稅。
好喇！𠵱家經濟終於好番啲，銀行又水浸，樓市又點呢？差餉物業估價署報告話，05/06兩年嘅住宅落成量合共得3萬3千幾，商業單位落成更加係70年新低，點講都算係供應斷層啦，不過樓宇投資意欲仍然淡靜，何解？
利世民認為，最終都係投資者信唔過政府。董治時代嘅經歷係一個陰影，不過最大問題係兩鐵主導嘅發展模式。𠵱家冇人知呢兩個特權怪胎會唔會瘋狂擴張，亦唔知佢哋會唔會瘋狂起樓，所以一日有呢個不明朗因素，樓市仍然有隱憂。
利世民