恒指連升10日後，昨日斷纜。斷纜都好，再由頭計過，睇吓今日起又連升幾多日。
恒指最低15824，埋單15918，低位回升94點，市底仍壯，炒家唔肯離場。期指低水79點，唔使慄，好多時市場智慧唔一定啱，調轉嚟，低水代表個市向上。而且，滙控（005）下周一宣布第4季息，估計派0.29美元（2.26港元），按照往年習慣，喺3月18日前後截息，到時拖低恒指81點，啱啱正係期指（3月）低水個數。
中銀C輪9068：滙控（005）又升0.60元，收133.60元。中銀（2388）升5仙，收15.65元。國內銀行股升完，到滙控升，滙控之後，8成輪到中銀，唔通中銀唔係銀行股咩？想搵食，買中銀C輪。9068收87仙，跌1仙，正路之選就係佢。
9068今年6月尾夠鐘，溢價得0.6%，槓桿率18倍（有效12.9倍），引伸波幅13.9%。
中電C輪4733：中電（002）盤數靚，升0.30元，3隻C輪隻隻掂，升幅由8%至13%。中電連特別股息派0.94元，相等於股價2.1%。中電C輪溢價要計埋呢條數，計落追唔過。勉強要買，揀4733，6月初到期，輪價20.4仙，溢價1.1%，槓桿率21.8倍（有效13.8倍），引伸波幅16.2%。
章盛