自95年超任推出《聖劍傳說3》後，機迷日等夜等，終於等到《聖劍傳說》有新一集出現！雖然正統續集嘅《聖劍傳說4》仍未決定推出日期，只知對應PS2，不過NDS版《聖劍傳說DS》卻搶閘出籠，透過Wi-Fi更可重現當年合作過關嘅玩法㖭！
記者：許福合
(C)2006SQUAREENIXCO.,LTD.AllRightsReserved.
講到NDS，當然好多人都立即想起佢個雙芒同TouchScreen，筆者第一時間就諗，究竟SQUAREENIX會點「玩」盡個芒？可惜當筆者完成第一個版圖，連Boss都打贏，仍未發現雙芒有何特別用途。遊戲多數係以上芒進行，下芒主要用作資料顯示、地圖、任務目標等，看來SQUARE只係將雙芒睇作「多一個芒」咁用，雖然部份武器、工具及魔法可選擇，以下芒顯示時都可用手指「篤」來選，不過筆者覺得以十字掣來選反而快得多。
4人合作過關
比較特別係部份場景動畫會利用雙芒特性，做出特別視覺效果，睇落就冇咁悶。此機亦會對應NDS無線功能，主要可作4人合作之用，可以攻破一人無法應付之強敵或寶物，只要互相照應，即使玩家之間等級相差遠亦無問題，而協助魔法精靈能對應整個隊伍使用魔法，可補血或作戰，另外，特設對戰模式，刺激得嚟重有機會取得特別道具，值得一玩。
選擇精靈護身
既然係RPG遊戲，總係離唔開接任務、打怪升級嘅玩法模式，玩家一開始就會喺村莊接到任務，不過同NPC對話都係日文多、漢字少，唔識日文嘅玩家就比較難了解故事，惟有同村民多說話，直至下芒顯示任務目標，咁就可以出發！出發前仲要記得整理裝備，因為離開村莊後，係唔可以替換身上架生。另外，仲可以選擇跟身嘅精靈，每個精靈都有唔同特性，留意介紹會有屬性說明，若能因應環境選擇對提升戰力好有幫助。作為RPG遊戲，等級其實代表實力，當發現唔夠打時，按下Start就可以回村，一來可保留經驗值，二來亦可將身上裝備升級才出發，再次挑戰時就可以打得輕鬆好多。
打Boss要有耐性
喺戰鬥時，主要都係弓劍為主要武器，用劍的話留意通常每3下，就會將怪物擊飛一次，呢個時候記得先退幾步，讓怪物追上來，因為遊戲設定以範圍區分，當玩家或怪物被擊退進入範圍，新嘅怪物就會出現，隨時有被圍嘅危險。玩家亦可用隔山打牛，將敵人或木桶之類擊開，就有機會連鎖攻擊多個敵人，相當好用。不過當遇到Boss時，就要考玩家反應同耐性，當Boss出現附近時，都會有光點顯示，先習慣Boss行動同攻擊模式，因為有時Boss出招係打唔到佢，倒不如先避開，等下次出招時機。另外記得呼叫精靈出來幫手，針對敵人屬性便可事半功倍。
遊戲類型：RPG
對應機種：NDS
遊玩人數：1至4人
開發商：SQUAREENIX
售價：$350
售賣點：DreamStore（25753285）
灣仔東方188商場G04、256號舖
