糕點師傅傅永祥說：「順德土產白糖糕應該甜中帶香鬆軟彈牙，色澤蝦肉色，坊間啲人無知，竟然話白糖糕應該係酸嘅，唉！」傳統製法生磨粘米發酵成米漿，發酵時間要拿揑準繩，時間未夠發不起，太長則變酸，之後撞糖水再猛火蒸半小時冷卻即成。
「擺雪櫃兩三日無問題，包保鮮紙唔會變乾，冷食得，熱食隔水蒸15分鐘又得，不過𠵱家天氣唔穩定，米漿要浸6至8個鐘頭，夏天就浸兩三個鐘。」白糖糕好與壞，他一望而知：「望落奶白色，唔掂；糕裏面有大大個窿，代表發酵發到過晒龍，又或者貪方便改用粘米粉開水，坊間有99%都係呢種偷懶貨色，唉！」他「唉」得有道理，靚靚白糖糕其實不是秘密，變酸，只因人心也變了，變得懶了。
坤記糕品（23600328）
地址：深水埗福華街115至117號北河大廈地下10號
