《信報》話賣都話咗好長日子，但𠵱家都未有聲氣。最近佢哋嘅賣盤問題似乎真係有啲眉目，有接近小小超嘅人士同八方講，小小超同《信報》老闆林行止夫婦已經差唔多傾掂數，小小超仲將《信報》視為囊中物，但因為有啲細節好複雜，所以可能都要幾個月後先完全搞掂。
唔干預編輯問題
自從小小超有意收購《信報》嘅消息傳出之後，好多人都媽媽聲，擔心大財團控制後，《信報》完全無晒編輯自主可言，報道一定唔夠客觀公正，真係潑咗勁多冷水。
有人話小小超都有留意到呢點，所以佢已經諗咗解決方法，費事《信報》因為咁多猜測而俾人狂插，影響銷量又影響埋公信力。
講到咁巴閉，查實條橋係咩呢？原來就係成立一個編輯委員會，由委員會成員自行決定《信報》編輯方針，重要規定埋就算係管理層，都唔可以插手編輯問題，費事俾人話干預新聞自由啦。
據知小小超心儀從政經驗豐富、民望唔差以及受到民主派、愛國愛港陣營以致特區政府接受嘅人出任委員會主席，希望佢可以壓到場。但究竟有邊個人合乎資格而又肯幫手，就真係無人知喇！
小小超仲有另一個諗頭，就係搵一啲唔同黨派代表坐入委員會，希望喺人人有份、永不落空之下，可以畀人感覺佢哋唔偏袒任何人，又唔使得失任何一派，咁就verygood喇。
不過，八方聽咗之後就覺得條橋唔太work喇，唔知係咪小小超比較少留意𠵱家嘅立法會，只要佢聽一次會，就明白點解呢招行唔通，事關但凡有齊各黨派代表嘅委員會，都係互相吹水互相攻伐一輪就收檔，有時拗一個議程，都可能用咗成個幾鐘。
最大問題係一旦涉及各黨派利益嘅時候，大家就更加勢成水火，真係好難純粹以編輯自主角度出發，睇嚟小小超真係要深思熟慮之後，先至決定行唔行呢一步棋，否則一失足成千古恨，他日個委員會日日只係水溝油咁拗餐懵，佢就後悔莫及喇。
爆料熱線：29290000、27860099
報料傳真：26239278
報料電郵：[email protected]