物業管理公司近年積極參與公益活動，由恒基地產做首席贊助嘅第十三屆「綠色力量環島行」籌款活動，旗下恒益同偉邦物業管理，響應參賽，共派出三支隊伍出賽，總共攞到兩個獎項，成績都算唔錯。
呢個全港最大型嘅慈善行山活動，由○四年起新加「物業管理盃」組別，今年有九隊參加全程賽事，八隊半程賽；當中重首次有女子隊㖭。恒益贏咗半程賽事亞軍、偉邦攞到全程賽季軍，女子組奪得第五名。
兩管理公司喺三年嘅「物業管理盃」比賽中，總共籌到八萬蚊，用嚟推動中小學及幼稚園嘅環境教育。
講開做善事，利嘉閣地產一班高層，上個禮拜六幫紅十字會賣旗籌款，董事陳大偉重帶埋個仔去㖭，等仔仔明白做善事嘅意義。聽講英皇集團地產部總監張炳強就幫趁買旗。