港股連升10日，卒之一口氣上到16000關（最高15999），收15949，升93點，成交有359億元。
大市由近期低位15241回升，足足升咗700點，隨時會出現調整，16000大關阻力，其實心理大過實質，整固完成後，有機會再上，初步目標係16200。
呢個升浪，國企行先一步，跟住藍籌接力，升足10日，回氣之時，又會輪番國企。今年上半年，國企始終係大市焦點，大漲小回，每次調整，都係低吸機會。
今日推介鞍鋼（347），呢隻股，有大行睇好，亦有人睇淡，但佢近期嘅股價，就有極強勢表現。由於鞍鋼收購母公司資產後業績會出現高增長，加上有機會在下一輪恒指成份股「換班」時晉身成為藍籌，因此，未來半年，股價仲可以睇好。
近期對鞍鋼有利的消息，係鋼價止跌回升，公司已宣布把冷軋板售價上調10%（而最大鋼鐵集團寶鋼更加價18%），預期價格漲勢在上半年可持續。另外，中央已決定治理鋼鐵產能過剩問題，具體措施會在全國「兩會」後出台，估計約25%的落後產能會被淘汰，對鞍鋼長遠發展有利。
基金揸重貨
鞍鋼已完成股改，發行A股收購母公司的「新鋼鐵」後，發行股數上升到59.33億股，市值約376億元，足夠有條件成為恒指新貴。恒指新貴，PE應值幾多？
鞍鋼預計，完成收購後，06年（12月年結）的合併盈利，將不會少於61.28億元人民幣，折算每股盈利1港元，以PE8倍計，股價已可見8元。；仲有，鞍鋼話會將盈利一半用來派息，即每股派0.50元，即使股價8元，都有6.25厘息，仍然好吸引。
基金睇好鞍鋼，揸重貨，H股股數8.9億股，揸貨基金有摩根大通、高盛、UBS、Pictet（倫敦）、新加坡政府同德銀等，5大基金合共持有35.94%，7大則持有44.98%。
鞍鋼上月中由4.30元起步，升上6.10元後反覆調整，形成上升三角形，上周再破位而上，照度上去，上升目標7.60元，近3日跟市調整，可視為後抽，整固後再上，更健康。
郭兆誠