做得富豪，當然要愈玩愈豪，近幾年富豪界就興買私人飛機。彤叔嘅好友明嘉福噚日喺君悅開Party，彤叔同純官鄭家純，以及有彤叔掌櫃之稱嘅魯連城都有到賀。為咗搞氣氛，大會仲請咗最後一個登陸月球嘅太空人EugeneA.Cernan來港，大家好自然將話題拉到上天。
彤叔嘅老友大劉（劉鑾雄），舊年尾就豪擲11億買咗3架私人飛機，明嘉福就睇中咗最新發明嘅「空中的士」──Jetpod（圖一），同朋友夾份買起發明者MikeDacre成間公司。佢話自己夾咗200萬英鎊，即係2700萬港銀，大概佔四成股權，至於其他投資者據聞包括Media8Entertainment主席Sammy李耀湘。
阿Mike發明嗰架Jetpod，就係BruceWillis喺《第五元素》開頭揸住嗰架空中的士嘅現實版，起飛嘅跑道只需400公呎。華華問純官會唔會買番隻玩吓，佢笑笑口話「有錢就買啦」。聽阿Mike講隻飛機造價一兩百萬美金，港紙不過千零萬，你同我就話冇啫，純官鋤幾鋪弟都喺度啦！
