鬼佬Ｃ係外國人，係專業人士，來港二十幾年，學曉咗廣東話，某次揸車入停車場，因唔多熟路，行錯線，停車場護衞員以為佢唔識中文，喺後面用粗口問候佢，鬼佬Ｃ為之撞火，停低架車與護衞員用廣東話理論，護衞員一來「恐洋」，二來諗唔到呢位洋人竟然識得廣東粗口，嚇到啞口無言。鬼佬Ｃ講起呢件事都㗎㗎笑。
鬼佬Ｃ以前喜歡跑馬，經常與太太入場，但五年前有咗乖仔之後，已經好少入場，理由係逢星期日跑馬之時，家中菲傭放假，冇人在家照顧乖乖，太太唔肯去，佢亦唔想太太一人留在家裏睇仔。鬼佬Ｃ慨嘆：「我自己老竇係標準馬迷，我出世之時，佢已經抱住我入馬場，後來大咗一啲，老竇下注，我就喺馬場草地玩。嚟咗香港，先知道細路唔准入馬場，我要等多十零年先至可以帶個仔入馬場，你話幾冇癮呢！」點解如此，左丁山知道原因，鬼佬Ｃ亦知道原因，就係香港啲高官怕咗道德重整派，唔敢放寬限制、畀細路入馬場。自細入馬場，會唔會成為病態賭徒呢？鬼佬Ｃ認為此說乃信口雌黃，講嘅人自己都唔信。冇法啦，鬼佬Ｃ話：「為咗政治正確，言論自由與家庭行為，都受到障礙。」
「政治正確」可大可小，哈佛校長森瑪斯就成為犧牲品啦。佢去年講過點解女性頂尖科學家數目唔夠男性多，其實合乎情理，但哈佛啲自由派教授立即群起而攻之，鬧佢歧視女性，以森瑪斯咁叻嘅人，都唔敢反駁，死死氣認錯道歉，希望息事寧人，但自由派（美國左派代名詞）梗係唔肯放過佢，一直與佢糾纏，迫到佢自動辭職為止。禍從口出，此乃最佳證明，森瑪斯係天才，尚且遭遇如此命運，其他人等，更加要小心，香港特區政府高官最識為官之道，豈會讓馬迷帶細路入馬場。