兩岸爆發「統獨紛爭」，區內本應陰霾不散，不過港股仍持續上升，直逼16000大關，港股連升10日，收報15949，升93點，成交359.77億元。
今日場外期指結算，港股可能連升11日，而滙控（005）今次升浪，起碼都要掂一掂134元才回頭。
內地金融股近日遇上重大沽壓，交行（3328）跌3%至4.85元，成交4.78億元。建行（939）亦跌1.34%至3.675元。
黑客話，熱錢轉向炒藍籌，內地金融股有調整好正常，資金除咗睇好藍籌業績外，亦為咗挾高期指結算，等今日的場外期指結算後，熱錢或會再流入炒中資股。兩會3月開幕，金融改革會是熱門話題，亦可能有人民幣升值的利好消息，內地金融股應未炒完，不宜睇淡。
冠捷最怕似創科
冠捷（903）配售反應欠理想，以下限9元定價，配售1.065億股，股份噚日復牌亦破底收場，報8.90元，跌7.77%，成交高達10.5億元。
i師傅話，冠捷今次配股，有趁高骨水之嫌，千祈唔好係第2隻創科（669）。
創科去年9月升上20元水平，以19.25元配股抽水，股價輾轉下跌至今仍未止瀉，噚日再跌3.52%至13.70元，貼近大摩所訂目標價13元水平。
中生北控（8247）首日掛牌，最高亁升至2.925元，收報2.725元，較上市配售價高出36.25%。此股的首日升幅冇長安民生物流（8217）咁大，可能係股民開始對貨源過份歸邊的股份有戒心，怕接咗火棒。
另一隻不經公開發售的新疆天業（8280）今日掛牌，以下限1.18元定價，配售1.76億股，首25名投資者已承配85%配售股份，又是一隻街貨極其歸邊的新股。
阿虎