嘩！香港又一次出現基因突變！大家唔需要驚慌，利世民唔係講H5N1或者沙士冠狀病毒，呢次基因突變嘅只不過係一間「仙士」蚊式公司，DNASecurity（1051）。
呢間公司由以前嘅星光，變成星光數碼動力，變成生物科技，變成信用卡防盜系列，今次又搖身一變成為石油概念。呢種將公司變變變嘅手法，直頭好似科學家用基因突變嚟創造新物種一樣。DNASecurity嘅大老闆黃金富，人稱香港愛迪生，利世民認為愛迪生都一定唔及得上佢咁有創意，至少愛迪生諗唔到點樣可以將基因突變轉化成企業發展模式。黃金富曾經主張以大笑抗癌，今次又有能力令到公司基因突變，利世民覺得佢有資格獲提名去攞諾貝爾獎。
老實講，企業轉型乃自然現象。但係幾年之間有咁多轉變，利世民有時候真係懷疑有冇咁多才多藝嘅管理層，可以犀利到一直不停急速轉變，重要次次都可以走在潮流尖端。以前嘅公司如果可以好好咁捕捉一個大浪，閒閒哋食十年八載，唔通世界真係變得咁快？
石油都起泡？
利世民攞住信用卡防盜最新嘅公布，佢哋話將會同馬達加斯加政府合作，開發石油同天然氣。利世民第一個關心嘅問題係︰「點解會有人揀一間手頭現金等值只得千零萬嘅公司合作開採石油？唔通馬達加斯加政府真係唔知世界有幾大？」
睇真啲個「刁」嘅內容，又唔見有啲乜嘢古惑。簡單啲講，呢個油田嘅出品係近乎加拿大油沙嘅重油，所以開採出嚟之後要經過提煉先賣得出。以利世民粗略估計，只要籌到10億美金，再加上喺全面投產之後能夠每日可以出產10萬桶石油，仲要連續10年穩定地有呢個產量，仲要油價持續響每桶40美金以上，只要可以完全符合呢四個條件，單「刁」都仲可以叫做合理。
不過馬達加斯加內戰結束冇幾耐，未來十幾年嘅政局真係好難講，而且其實石油價格炒上已經三年，有石油分析員話除此之外真係未試過持續響40美金以上。最重要一點，就係今次嘅合作夥伴中聯石油（346）先至係同馬達加斯加政府關係密切嘅單位，點解咁筍嘅「刁」要搵間完全冇石油經驗嘅公司合作？佢哋又唔係多錢過人，真係唔明！
不過根據過往經驗，某發明家加入戰場，往往就代表泡沫快要爆破，唔知呢次係唔係石油泡爆破嘅先兆呢？
利世民