又有新股掛牌勁升，今次輪到中生北控生物科技（8274），昨日新登場高見2.925元，收2.725元，比起招股價2元，高出36.25％。
經紀陳話，普通散戶只係得個睇字，因為一如好多創業板股，中生北控都係以全配售形式上市，貨源極其集中，要炒上根本無難度。因此，創業板新股表現，唔能夠成為其他新上市股份的指標。
另外，好耐冇動靜嘅中國稀土（769），當真係不鳴則已，一鳴驚人。
昨日中國稀土公布與美國通用簽訂策略聯盟，股價即刻抽上14.14％，收1.13元，創下52周高位，成交急增配合升勢，金額高達3382萬元。
經紀陳話，據講今次中國稀土同美國通用嘅策略聯盟只係前戲，市傳美國通用有意入股中國稀土，雙方一直交往甚密，做埋股東係遲早嘅事。不過，隻股冇炒咁耐，昨日明顯有大量投機買盤追入，短線炒家或者會睇位食糊，最好睇定啲，先至決定跟唔跟入。
慕容小初