地產經紀為把握做生意時機，出埠送定，已經唔係新鮮事，近排就有三單呢類千里迢迢送定嘅個案。
菲律賓近排政局混亂，港人冇乜必要都唔會去玩，偏偏中原地產西半山高級分區經理黃國明（Paul），偏向虎山行，喺當地實施緊急狀態令當日，單人匹馬飛去菲律賓，就係為咗送定金畀業主。
阿Paul話，原本唔使佢親自出馬，不過咁啱負責呢單生意嘅同事，旅遊證件過咗期，佢惟有捱義氣夤夜出發，當時佢並唔知道菲國發生政變，去到之後看見公路布滿路障，打聽之下先知發生政變，好彩喺當地開餐館嘅華人業主，派司機去機場接佢，簽完約之後，重叫司機帶佢去買手信。
呢單有驚無險嘅交易，係摩星嶺道華亭閣，面積約二千呎，成交價一千二百三十萬，呎價約六千一。
港灣豪庭東莞成交
另一單係大角嘴港灣豪庭，世紀21中華物業楊官華透露，一對準新人買入九座連平台單位，一百六十八萬，每呎三千四。由於買家趕住入伙，業主又唔喺香港，於是代理就夤夜送定去東莞。
重有一單係冷門啲嘅工廈，中原九龍西工商部助理營業董事方德智遠赴星洲，送定到業主手上，促成屯門冠華鏡廠（第六）工業大廈低層單位，成交價五百八十五萬。
電郵地址：[email protected]