灣仔平日已經人多車多，噚日正月lastday，就更加熱鬧，先有明嘉福喺君悅開Party，再有華潤集團喺自己地頭頂樓搞春茗，之後會展又有曾特首做主禮嘉賓嘅頒獎禮，除咗一眾兩頭騰嘅傳媒外，最忙嘅睇怕都係近兩日見報率爆晒燈嘅鄭裕彤，事關佢捧完老友明嘉福場，又過去華潤打招呼。
彤叔未到君悅，一眾攝記已經擺好陣等佢，搞到佢未坐定已經要走，但之後又返轉頭入場同老友影相，成七點半先去華潤嗰邊。華華問佢趕兩場辛唔辛苦，佢猛話「好慘！好慘！」不過佢都留到完場先走，非常畀面。
除咗彤叔以外，到場嘅重有五分鐘就走嘅李國寶，以及郭炳聯、陳祖澤、李家祥、轉行賣咖啡嘅翁以登、完成咗7+2嘅王石，加埋主禮嘅廖秀冬、蔡瑩璧同中聯辦孖寶郭莉同鄭坤生等，賓客兩三百人，主人家宋林同一眾集團高層開心到見牙唔見眼，成晚滿場飛。
大部份春茗，不外乎致詞祝酒食吓嘢，但噚晚華潤個春茗，就搵咗專人做默劇，講集團奮鬥同成長歷程，再加埋喺室內放小型煙花，睇到一眾賓客嘩嘩聲，都算係別開生面。
李華華