孫公做咗房屋局後，都頻頻處理好多單大嘢，孫公自己就話，處理房屋事務簡直係「歎為觀止」，例如一向被視為平民區嘅深水埗咁，嗰區好多由居屋改做公屋嘅樓都靚到不得了，重賣花讚花香話抽到就有着數，既然咁鬼好，所以政府一定唔可以再賣公屋，以免被人話大平賣，而且賣公屋手尾好長。
至於領匯呢，孫公就梗係唔認係賤賣資產，反而力撐賣完輕鬆好多，因為紓緩好多財政壓力，又話房委會至少可以將啲錢搣多十年八年，原來銀根充足，怪唔得孫公咁風騷。
問到孫公會唔會做多一屆，佢就笑笑口話無人搵我喎。至於煲呔有冇機會連任，佢就笑話一定有對手，但係未必係真正對手。八方記得孫公同煲呔同年出生，如果煲呔有精力競選連任，孫公都可以繼續去，事實上八方都聽唔到佢有任何萌退之意，唔知佢係咪真係等梗煲呔金口一開再諗呢？
爆料熱線：29290000、27860099
報料傳真：26239278
報料電郵：[email protected]