最近班炒家雖然話轉審慎，不過恒生銀行件土瓜灣偉恒昌新邨商場，都有唔少人爭，結果由朱鈞記金屬製品廠董事長朱鴻鈞，以私人名義同幾個生意拍檔組成嘅公司，以出價超過三億二千萬勝出。
聽聞作風低調嘅朱生，佔兩成幾股權，主要股東係佢嘅梁姓友好，買呢個場都係長線收租為主，短期內唔會有乜大動作咁話。
偉恒昌新邨商場雖然舊啲，但勝在嗰區夠成熟，舖位同停車場出租率都算理想，一個月收緊百七萬租，回報率足有六厘，如果連啲吉舖都租埋，分分鐘去到七厘。
喺深圳同粉嶺都有五金、塑膠等實業生意嘅朱生，喺舖市唔算太活躍，今次打低有入標嘅資本策略同盧華等實力投資者，都算一鳴驚人。
另外，資本策略舊年夥雷曼兄弟買咗幢觀塘工貿樓後，仲有幾億銀喺手，佢哋話目標都係搵租金回報理想嘅寫字樓或舖位，長線投資。