阿扁玩嘢，台股照升，港股亦進賬93點。最大功臣係滙控（005），升1.20元，帶動恒指升43點。滙控過去4日成交股數依次係12球、24.8球、36.8球、47.5球，日日增加，股民掟咗160億銀落去，點會窒步。睇吓下周一派成績表前後，去到乜嘢位。
滙控C輪9607：滿城爭說滙控，太多人講，會唔會價高勢危？你同我定。滙控上月10日見過131.90元，𠵱家133元，只係高出1.10元。睇埋恒指，上月最高15816，𠵱家15949，只係高出133點，並未升到狂晒。滙控與恒指都係只較上月高位高出1%，點算升過龍？
滙控繼續去，炒滙控C輪，除咗揀2228之外，9607亦係諗得過嘅靚嘢，5月尾夠鐘，輪價47.5仙，溢價得0.5%，槓桿率勁，有28倍（有效16.8倍），引伸波幅14.3%。9607仲有度好，就係街貨得18%，容易辦事。要賺1倍，有冇可能？滙控由現價133元喺3個月內升上138.40元，只不過平均每月升1.8元就搞掂。
交行C輪2292：交行（3328）昨跌15仙，收4.85元。再跌啲，買C輪2292。
隻輪7月中到期，輪價66仙，溢價4.1%，槓桿率7.4倍（有效5.6倍），引伸波幅30.1%。
章盛