向來對橫街窄巷的小店情有獨鍾，皆因小本經營啖啖嗒落有感情，兩名老外Brian同Martin同我一樣好曉捐窿捐罅搵食，今晚殺入蘭桂坊窄巷食甜品，仲興起搵同鄉即席試味。兩個麻甩仔，唔劈酒改劈糖水仲過癮，保證Sweet過斷背山，就算唔係HappyTogether，都一定有HappyEnding。
記者：陳慧茵
攝影：陳智良
舖仔小小有200款糖水
老外推介的甜品舖叫「甜言蜜語」，開正蘭桂坊隔籬，最啱飲完兩杯落嚟傾偈回一回氣。老闆娘Isabella曾任教烹飪中心，厲害在小小舖仔居然有200款甜品選擇！除大路傳統出品外，新派自創甜品糖水都唔少，芝麻糊、合桃露、杏仁茶等全部用石磨製成，入口滑溜無渣甜度適中，佢話：「坊間好多甜品舖，茶、露、糊不分，糖水稠到好似糊咁，唔掂！舉個例吖，杏仁其實要夠清先好味，所以應該用最稀質嘅『茶』嚟配搭。」至於新派糖水亦夠創意兼考功夫，佢又咁話：「我本身鍾意食矜貴糖水、靚糕點，所以雖然係小店經營，都想食客試到正嘢，好多刁鑽甜品糖水喺大酒店先試到㗎咋。」如此誠意，難怪鬼佬都撐。
香芒白玉卷$25
煙韌糯米皮內釀新鮮呂宋芒及自製奶油，面層撒椰絲入口軟綿，當日街訪試食唔夠1分鐘已搶購一空，老外激撐。
薑茶湯圓$16
Brian最愛，老薑煎製的薑茶有解酒功用，入口微辣不嗆喉，湯圓皮薄煙韌，芝麻香而不膩，愈簡單愈見真章。
鮮果水晶晶$20
用高纖蒟蒻伴以生果製成，1碟4件，有齊火龍果、奇異果、士多啤梨及芒果，Martin：「賣相靚到唔捨得放入口。」
雪糕芝麻糊$20
凍食的芝麻糊質感較杰，香味稍遜，不過配搭雪糕味道及口感卻出奇匹配，最啱鍾意試新口味的年輕人。
性感艷星$20
首創，即馬蹄檸檬露，因名字諧音似瑪麗蓮夢露得名，馬蹄打碎後粒粒Size一樣，Martin：「好Fresh。」
焗朱古力西米布甸$18
朱古力通常以夾心形式藏於布甸中，呢度做法唔同，整個布甸焗得黑漆漆，朱古力香味濃郁。
甜品舖醫飽肚
咪以為只限糖水Only，呢度仲有飽肚嘢食，質素唔係買菜搭棵葱咁無誠意，而係正宗馬來西亞菜式，單單一味肉骨茶已做到街知巷聞，唔少老饕翻兜幫襯，不得不讚老闆娘的細心體貼，親身驗證過，客人點菜前Isabella會詳細講解菜式，食到一半又會問食客意見，因為講嘢太多仲令到聲帶受損，好多食客都俾佢誠意打動成為朋友，小店人情味多多錢都買唔到。
（上）亞參喇沙$55
（下）招牌喇沙$55
Martinbuy招牌喇沙，配料有海鮮及雞肉，配一半油麵一半米粉，堅持正宗星馬做法，臨走打包多碗走；Brianbuy亞參喇沙，用香料亞參子、鮫魚及沙甸魚碎配米粉食，同係鬼佬都會意見分歧。
大肚婆炒飯$56
自創菜式，用薑粒、瑤柱絲、蛋白、豬肉絲炒成，香濃薑味夠醒胃，唔係大肚婆都食。
檳城肉骨茶$48
用當歸、甘草、南棗、龍眼肉等20多款藥材烹調而成，色深味濃帶香甜，難得排骨煮得鬆軟，食時記緊以油炸鬼蘸湯同食，再將湯喝個一滴不留。
食客有Say
得兩個老外唔夠代表性？好，一於帶齊香芒白玉卷、鮮果水晶晶同薑茶湯圓，等飲飽食醉嘅老外評評分。
甜言蜜語（24101567）
地址：中環和安里4-5號地舖
營業時間：11:00am-11:00pm
座位：60個
