近年來一啲創作歌手愈嚟愈受歡迎，當中新人王側田就係一個好例子，佢出道短短一年就已經可以踏上紅館開個人演唱會，真係破晒紀錄。側田喺三月廿六號就舉行第一場演唱會，啲門票喺公開發售十分鐘內已經售罄。
首次跳舞
唱片公司就乘勝追擊，為佢加開四月十八同十九號兩場，噚日公開發售唔夠兩個鐘又賣晒飛，就連另一位創作歌手光良喺三月廿九日嘅個唱，啲飛都喺公開發售三日之內賣晒。相反今年復出嘅關淑怡嘅號召力都唔及呢班新人啦，佢只係舉行三場演唱會，但開騷前都只係得一場嘅一百蚊飛爆滿，相信佢自己都跌眼鏡。
側田見第二次賣飛都有咁好反應，佢就話自己覺得好開心，不過同時又開始覺得好緊張，因為距離佢第一場個唱嘅日子愈嚟愈近。呢排佢除咗忙於為個唱綵排之外，仲忙於籌備第二隻廣東大碟。
側田仲話觀眾用得幾百蚊買飛入場睇佢，佢就會畀一個意外驚喜大家，到時佢就會首次喺萬幾人面前表演跳舞。據知，側田第二隻碟會喺佢演唱會前兩日先推出，相信香港都冇乜歌手會好似佢咁做，實力派果然係唔同啲呀！