觀塘apm近排密密搞大型宣傳活動，加上多個節日帶動，人流量不斷搶新高，噚日請嚟韓星宋慧喬加車太鉉搞花生騷，現場迫滿睇明星嘅市民。新地代理租務總經理馮秀炎，趁機公布apm自舊年七月開幕，人流量總計達到五千八百萬，假設接近七百萬個香港人都去過apm，八個月內每人都去超過八次，先有咁嘅數。
馮秀炎話，人流多，最大得益都係商戶，大業主新地當然更加和味，事關租金提升收益更多，總計咁多個月嚟，新地所收取嘅租金提成平均每個月有十五個巴仙，掟咁多人力物力去搞宣傳都係值得嘅。
嚟緊嘅三月份，有個三八婦女節，新地都唔放過，聽馮秀炎講，屆時珠江三角洲會有二十幾個旅行團，專程到apm消費，估計人均消費額係二千五到三千五左右，人流就二十五萬到二十七萬，只係比今個月情人節三十三萬人流少啲啲。
電郵地址：[email protected]