每年二三月都係轉工高峯期，今時今日想留住好夥計，淨係加薪都未必得，好多時都要諗吓新意思，等員工多啲歸屬感，好似渣打咁，今個月就出咗全港首張專為員工而設嘅ExecutivePlatinum信用卡（圖），淨係員工先有資格攞，而直系家屬就可以申請附屬卡，年費全免。
渣打話，張卡最大賣點係，去邊度買嘢都有1%現金回贈，事關出卡之前，銀行曾經問過同事意見，發覺絕大多數人都覺得回贈最實際；若果員工日後離職，張卡就會自動註銷。
既然係員工專有，咁碌爆卡或者貸款，利息會唔會有優惠呢？答案係──唔會！華華覺得，渣打發員工卡呢招，都可算係一石二鳥，嘅可以冧吓員工，又乘機增加發卡量做生意，都咪話唔醒。