情人節雖然過咗，但只要有心，都一樣可以令身邊人甜甜蜜蜜。好似香港嘅「第一夫人」曾太咁，噚日特別走咗去太古城中心，幫伸手助人協會義賣曲奇。
着住圍裙、拍住一個老婆婆周圍搵人買曲奇嘅曾太，可能受到太多記者包圍住，搞到無人敢埋佢身，結果賣咗幾分鐘，都只係有一位善長仁翁肯慷慨解囊，銷情慘淡。
最終曾太臨走前就好識做，喺手袋仔度攞咗張「紅衫魚」出嚟幫襯，𠱁到老婆婆好開心。八方問曾太係咪送畀煲呔，佢就笑笑口話「係」，煲呔應該好冧。
范太噚日都有幫手義賣曲奇，原來佢已經係賣曲奇「老手」，事關佢都出席咗呢個活動好多年，主辦單位仲大讚佢永遠都肯抽成幾個鐘出嚟，戰鬥力非常持久，真係好抵讚。第一年出席嘅長毛就不忘大彈香港老人福利好差，可惜佢講嘢時，曾太已經走咗，幫唔到佢向煲呔傳話。
爆料熱線：29290000、27860099
報料傳真：26239278
報料電郵：[email protected]