彤叔鄭裕彤旗下間新創建噚日喺沙田體育學院搞員工同樂日，華華原先以為又係一場悶蛋節目：大老闆頒吓獎，員工們WeWe嘩嘩一餐咁啦。點知，新創建今次特登搵人作咗首新創建之歌──「創建新一天」，仲請到陳潔靈上台，同所有新創建員工包括班執行董事大合唱，搞到全場氣氛鬧哄哄。
陳潔靈仲走落台唱咗兩隻首本名曲，最勁嘅係，佢話做高層嘅都要一齊參與嘛，然後坐響彤叔旁邊大唱特唱，肯定激死葉璇。不過，華華見彤叔表情呆滯，並無唱埋一份，係怕醜唔敢大展歌喉？定係心裏面掛住第二個靚女呢？
聽大公關關則輝講，遲啲會有廿幾位同事，同陳潔靈為呢首新創建之歌拍MV，然後在旗下新巴、城巴播放，話唔定遲啲用嚟賣廣告。但佢就死都唔肯講用幾多錢請陳潔靈幫手。
華華覺得，自從特首曾蔭權嘅細佬曾蔭培加入新創建之後，新創建嘅形象愈嚟愈活潑，連同樂日都搞得有聲有色，仲整埋企業之歌，真係唔睇得都唱得。吖，講開又講，新創建應該係最後一次喺體院搞同樂日，事關馬會好快將體院改建，預備用作08年北京馬術項目嘅主要比賽場地，新創建出年要換個地方啦。
李華華