花旗銀行定期調查有幾多人係百萬富翁（以流動資產計，房屋價值唔算），話香港島有最多百萬富翁，每七人便有一人，新界次之，九龍最少。呢類調查是否可信，好難講，大趨勢可以信吓嘅，細微資料就講多無謂。
擁有百萬現金及股票，就係百萬富翁？如果今日做調查，百萬富翁人數一定大增，幾個月前揸住十一萬股國壽（二六二八），今日已有資格做百萬富翁，其實以香港嘅生活水平，揸住一百萬而冇樓嘅話，點都冇資格叫做富翁，重好驚被炒魷魚㖭。嗱，有數得計，單身人士家居香港島，住一個細單位，月租萬幾，基本生活開支七八千，一個月總要過兩萬銀，一年二十四萬。正常嚟講，用一百萬買咗股票，一年可唔可以有二十四萬元回報呢？好難咯，你估股票日日可以升兩三個巴仙咩，升升埋埋，一次可以跌清光。若怕蝕本，一百萬元買晒債券，一年回報得四萬五千（以美國十年國庫債券孳息率計），未夠交租，單身人士冇咗份工嘅話，揸住一百萬元儲蓄食穀種，唔用得好耐，與「富翁」兩字，絕對沾不上邊。
有樓就唔同，傳媒老手Ｍ哥哥已經供滿層樓，仔女大晒，去外國發展，Ｍ哥哥周時對左丁山講：「錢唔使要咁多嘅，我兩公婆一個月用唔到兩萬銀，畀多啲我，我都唔識使！」有樓與冇樓，分別好大。花旗銀行調查百萬富翁分佈資料，相信係用嚟分析市場，鎖定目標顧客之用，與生活現實無關。若你係中產，兩公婆各有好工，又有一百萬元現金，間間銀行都會搶你做其尊貴客戶，卓越、顯卓客戶，稱呼你一聲為百萬富翁，令你飄飄然，有乜所謂吖。
二○○六年之香港，冇五千萬元以上淨資產，唔算得係富翁，擁資五千萬元以下嘅，係小康啫。揸住一百萬而冇樓（除非住緊公屋）？唔該繼續捱世界，喺老闆面前，千萬不可沙塵？