周末同經紀黃打波,佢問小初知唔知近排有隻股票批完之後愈升愈有,兼且不斷創新高?答案原來係偉誠控股(2300)。
偉誠在內地從事捲煙紙包裝印刷,早排以5億元向澳洲公司Amcor收購兩項業務,以發行新股支付,變相令該澳洲公司成為偉誠最大股東,交易剛剛通過,偉誠原來大股東,以每股5.70元,配售5846.8萬股舊股,以維持足夠公眾持股量。
雖然呢批舊股涉及金額有成3.33億銀咁多,但偉誠股價竟然無受影響,並繼續炒上,上周五升5.69%,收6.50元,再創上市以來新高。
經紀黃話,咁嘅現象只得一個解釋,就係貨源已經歸邊,落在強者之手。偉誠呢門捲煙紙生意在本地罕見,同類股唔多,所以有一定賣點,吸引芬佬要貨。隻股成交一直唔多,主要係街貨好亁,只要芬佬坐住唔願沽,隻股好易愈挾愈高,要屢創新高無難度。
慕容小初