滙控（005）下周一派成績表，呢幾日會繼續成為市場焦點。上周四與周五，中英港3地嘅滙控，交投明顯大增，芬佬用銀彈投票。上周五，美國收市85.49美元，折合港價132.67元，較上周五港價131.80元高。
過去1周，滙控升2.60元。C輪10份兌1股，溢價唔高嘅C輪，升15仙屬於正常，例如3400全周升16.7仙，9686升14.6仙，呢兩隻都係熱門貨。
滙控C輪2228：短期炒滙控C輪，都係揀上周五推介嘅2228，上周五單日只升得6仙，全周計落只係升得8.5仙，過於落後，有機會跟大隊上去。因為落後，啲數據靚晒。隻輪7月初夠鐘，輪價56仙，溢價0.6%，槓桿率23.5倍（有效15.2倍），引伸波幅13%。
滙控如果升勢強勁，其他槓桿率大嘅滙控C輪，當然升幅會更為凸出。但滙控如果穩步上升，則揸2228嗰類C輪則比較實際。
中銀C輪3670：滙控好，中銀（2388）亦唔會脫腳，買C輪，熱門貨揀3670。10月尾到期，輪價11.2仙，溢價3%，槓桿率14倍（有效7.9倍），引伸波幅20.6%。如果賭雞仔注，唔怕交投疏，買9777。輪價1.17元，6月初到期，溢價0.1%，槓桿率13.8倍（有效10.1倍），引伸波幅19.2%。
章盛