政府草擬了兩年的自訂車牌計劃終於嚟緊4月開始接受申請，萬眾期待，隨即成為全城熱話！但其實大家都唔知細節，原來就算你成功自選車牌，個「靚冧巴」最終都要作公開拍賣，即係精心創作隨時被有錢人Bid走！結果十個有九個聽完後，都有打退堂鼓之意，「咁即係鬥錢多啫！」
記者：許維雅
攝影：許維雅、伍慶泉
各界老作靚車牌
Q1﹕點解設計這個車牌？
Q2﹕知唔知申請過程？聽完仲有冇興趣？
薛凱琪（歌手）
1﹕用自己英文名FIONASIT，或者886。
2﹕雖然𠵱家無車牌，但都有興趣買定一個第時有機會有車時用。
崔建邦（主持）
1﹕用自己英文名。
2﹕一定唔會整，咁易俾人認得車牌，好易俾仇家搞架車！
Kary（歌手）
1﹕令人記住我係COOKIES嘅KARY。
2﹕未必會整，驚太揚。
謝安琪（歌手）
1﹕我隻白色松鼠狗叫BEELOO，加100因為紀念佢喺我屋企住咗100日，希望佢長命百歲！
2﹕都有興趣試吓！
黃子華（藝員）
1﹕棟篤笑入面嘅棟篤。
2﹕我唔想咁多人認得自己車牌，最好有咁難記得咁難記，自己都唔記得就最好。
蘇永康（歌手）
1﹕姓蘇，再加自己出生日期。
2﹕以前喺加拿大都已經想整，但已經有人用咗。今次一定會整，都唔怕俾人知，因為用乜嘢車牌狗仔隊都照跟。
朱凱婷（主持）
1﹕用英文名Heidi，加埋當年選港姐時嘅號碼。
2﹕今次都有興趣，但好驚有人搶到好貴，搞到買唔到！
楊怡（藝員）
1﹕跟自己英文名拼法。
2﹕唔清楚詳情。都有興趣整，但都驚俾記者好容易認到架車。
陳鍵鋒（藝員）
1﹕可以代表好多意思，任人聯想，你覺得係乜就乜啦！
2﹕太貴喇，我唔捨得買！
馬德鐘（藝員）
1﹕用番自己個姓。
2﹕唔會喇，車牌對於我而言唔係咁重要，有好多號碼都唔可以揀㗎啦。
BOB（DJ）
1﹕我係潮州人，梗係要講番潮州話啦！
2﹕太貴喇，唔會整！
BEN（DJ）
1﹕之前諗咗一個幾好㗎！但聽完成個程序之後，決定用呢個！因為我好窮囉！
2﹕知道程序後一定唔會整，想改用D0L9YU（多X餘），浪費申請者嘅心血。
Dantley（HeadCoach波鞋店老闆）
1﹕用舖頭名HeadCoach，冇咁多人爭，加埋幸運號碼13。
2﹕如果唔太貴都會想整。
超群（採購）
1﹕細細個見到超群廣告，經常有首歌唱636281，這是當年超群嘅電話號碼，襯我個名！
2﹕要競投就唔整喇，太貴！
自創車牌有幾煩？
Step 1申請
每年公開接受3-4次申請，第一次將在4月1日至30日開始。如果申請超過1,000份，就會進行抽籤。
Step 2查核
運輸署查核你的申請是否符合規定，例如英文字母唔可以用I、O、Q，意思亦唔可以令人不安等等，一切由運輸署決定。（詳見另文）
Step 3交錢
符合規定申請人須在限期內繳交$5,000按金，再經運輸署署長審批申請。
Step 4拍賣
運輸署會安排拍賣，並將拍賣會詳情刊登報章，申請人須出席拍賣會競投回自己設計車牌。（第一次拍賣預計9月進行）
點解唔抵玩？
競投底價為$5,000，即係申請得就要預$5,000最低消費。你無睇錯，設計完出來係要公開競投㗎，到時若大家都覺得你個牌靚嘅話，就要睇吓邊個銀包厚啲！咁點預Budget好？
攞靚冧巴兩個貼士：
1.若你嘅冧巴好個人化，其他人睇唔明，去馬啦！
2.你好有錢又有時間（手續多又要出席拍賣），去馬啦！
詳情查詢﹕www.td.gov.hk（電話：28042600）
自訂車牌 基本規矩
*自訂號碼不可以多於8個英文字母（I、O、Q不得使用），數字、空位亦當一個。
*8個字母/數字中出現空位可以多個一個，但不可以連續出現兩次。
*自訂號碼不可多於4個平排並列的同一字母或數字。
*自訂號碼可以用單行或雙行顯示，每行最多可顯示4個字母/號碼。
*自訂號碼不得與現行車輛號碼相同。
自創車牌Q&A
Q1：可唔可以大細楷﹖
答：英文字一定要用大楷。
Q2：車牌可唔可以轉讓？
答﹕車牌在一年內要轉讓的話，必須連車一齊轉讓，一年後可以自由轉讓。
Q3：一年有多少次拍賣？
答：運輸署估計2-4次，要按審批程序順利與否，即一年最多可做4,000個。
Q4：拍賣時可否取回$5,000及每個車牌底價？
答：每個車牌底價一定係$5,000，無論多少個字，若投回車牌價格高於$5,000，可扣回按金。若他人投得車牌，申請者亦可取回按金。
Q5：政府是否隨時有權收回車牌？
答：若車主成功投得車牌，但在使用期間遭人投訴不安，運輸署評審委員會會再次審查是否有問題，並非隨意收回。
車牌公司：靚冧巴我會爭
據專賣靚車牌的CarCity梁生所講，政府在2年前草擬自定車牌條例時，所有車牌價格立即跌價，因為大家都以為香港會仿效外國，以後整靚車牌又平又易。但當宣布細節後，車牌生意即升30%！原來創作跟現有投牌制度差不多，而且手續繁複。梁生表示公司唔會刻意設計車牌，但若喺拍賣會見到有靚冧巴，佢哋一樣會去投，例如大路嘅姓氏（例如MA字頭）和車型號碼（例如數字係360）就最受歡迎。規矩咁定，在商言商你又唔怪得佢，其實已經有車牌公司表示會創作一系列名人/名牌有關號碼，到時用十萬八萬拍賣返來再轉售。對於小市民，你花三晚通頂諗咗個靚冧巴，但拍賣時隨時會俾人Bid咗！
Bid前參考大市
冧巴值幾錢，梁生話行內人一睇就知。申請前可參考市價，例如創作得姓氏牌頭你就預咗貴，因較多人爭，又或者如168等幸運號碼亦較受歡迎，目前鎮店之寶係XX1668，盛惠$275,000！而不得轉讓車牌就例外，如清牌（即冇英文字頭）和單數字（例如648和AA2等），因為這些車牌本身屬於公司牌，法例上要轉讓，就要連空殼公司一齊買，價錢由幾十萬至一百萬不等，貴到嚇鬼！
車牌價格的升跌，可以好離譜，梁生話經典事例係最近賣了一個LU1314（一生一死）號碼，兩年前$2,000都冇人要，但今日價值20萬！全因一套《忘不了》，戲中張栢芝同古天樂的小巴將1314演繹成「一生一世」，戲一上，個冧巴價錢就係咁升！
CarCity（28936126）
地扯：跑馬地毓秀街19號地下
