咪睇Rosanne同Race細細粒就以為佢哋無啖好食，原來佢哋不但係大飯桶食量驚人，而且絕對稱得上專業食家，難得係點食都唔見肥，身材仲愈來愈好，難怪可以成為大少雜誌封面風頭躉啦。今日為食姊妹花為大家介紹2間位於港島北角區心水星馬餐館，包保大家睇完一定流晒口水。
記者：羅灝汶
攝影：陳偉強
勝利小廚：大啖大啖食
上星期兩姊妹要做電台節目，又要趕去旺角影相，大把工作在身，難得有機會放鬆心情大吃大喝，兩姊妹即刻興奮到跳舞咁飛身去「勝利小廚」。一走入店即點海南雞，Rosanne：「我好鍾意食呢度嘅起骨海南雞，因為味道同我哋新加坡嘅海南雞好相似，味道都好好。」Race：「我就貪佢啲海南雞肥瘦適中，唔會過份肥膩，食多幾嚿都仲得。」
海南雞半隻（起骨）$70
Race：「家鄉新加坡海南雞完全起骨，呢度一樣咁正宗，雞味香濃，啲飯都好入味，雞皮一夾就會跌出來，點埋酸辣醬就Perfect嘞。」
鐵板蠔仔$65
Race：「我平時唔係好食蠔仔，因為口感好怪，不過呢個鐵板蠔仔令我改觀，一般蠔仔餅好油膩好乾身，呢度就用蛋花去取代煎餅方式，另有一番風味。」
魚湯金菇浸大蜆$65
Rosanne：「呢度係勝利小廚新菜，平常整大蜆多數用酒煮，今次竟然用魚湯，真係幾特別，蜆同魚湯竟然可以配合得嚟又唔腥，真係連汁都想飲埋。」
泰式鹵豬髀$45
Rosanne：「我哋兩姊妹舉腳贊成泰式鹵豬髀超好味，特別係個汁料，一定要叫多碗白飯嚟撈汁，可惜我哋唔多食豬皮，淨係食肉感覺好浪費。」
竹笙魚唇扒時蔬$68
Race：「最清淡嘅一道菜，竹笙夠清爽、魚唇都好香滑，當你食完一連串濃味嘅菜式之後，再試呢一道菜個感覺會好好。」
花絮：2R胃口超大
勝利小廚（25669938）
地址：北角和富道124號地下
營業時間：11am-12mn
座位：約30個
廚師：小店主打外賣
除「勝利小廚」，2R仲推介一間由隱世高人主理嘅星馬菜館，舖頭主打外賣，全店只得四、五個座位，大廚贊師傅知道2R會同小記嚟影相試食，就一早預備好CD、海報畀兩位可人兒簽名，好搞笑。
香煎馬拉辣汁魚$48
Rosanne：「我哋好食得辣，呢個辣汁魚好似馬來西亞辣魚嘅味道，聽師傅話係由緬甸沙鯭魚煎成，如果可以再辣多啲仲好。」
清真羊西冷喇沙$54
Race：「師傅用印度方式煎煮羊西冷，入味之餘唔會過鹹，除此之外我仲好鍾意食羊仔扒，質感好唔同，不過味道一樣咁正，大家真係要試吓㗎。」
花絮：中坑大廚攞簽名
廚師（28062683）
地址：北角天后電器道63號B（琉璃街過海的士站側）
營業時間：12nn-3pm、5:30pm-10:30pm
座位：5個
