一年一度兩會就快又開始，今年嘅政協開幕禮會喺三月三號舉行，人大呢，就遲政協兩日先開波。
上年先做特首嘅煲呔，首次以特區揸fit人身份上京，雖然𠵱家知道佢冇機會同領導人閂埋門傾，但係佢一定會好忙，事關佢想爭取同珠三角九個省市嘅領導人同部委領導會面，為特區同自己搭通啲天地線。
煲呔暫定二號去六號返，新任新聞統籌專員何安達同新聞處處長蔡瑩璧會陪伴左右，Andy（何英文名）第一次上京，都係打醒十二分精神好。
煲呔今次都算做足準備，一早安排行會喺三月八號休會，等啲行會成員唔使兩頭撲，不過立法會就唔會叫停，周三會照開。
八方數過，立法會有四個人大代表，包括范太、馬力、中指黃同梁劉柔芬；政協就有成九個，包括田少、周梁、阿曾、譚SIR、陳鑑林、小霍、發叔、張學明同呂明華，即係總共有十三個人可能要兩邊走，以防民主派鍾意玩突襲。
爆料熱線：29290000、27860099
報料傳真：26239278
報料電郵：[email protected]