經濟學ABC問題︰「價格管制，結果是︰（A）消費者得益，（B）供應商損失，或（C）以上皆對。」
首先A一定錯，因為有價格管制，結果就會有排隊呢類浪費資源嘅情況。利世民經常強調，浪費時間比浪費金錢更可惜，因為錢使咗可以搵番，時間逝去就點都追唔番。最新鮮熱辣嘅例子就有的士同小巴石油氣加氣站。政府以地價補貼，換取專用加氣站用特惠價錢去提供石油氣，結果成本飛升之下，專用氣站嘅價錢同「非專用」氣站市價，足足相差25%。
浪費時間去排隊，對社會一啲功用都無，如果司機大佬重識得充份利用等入油嘅時間去自我增值進修一番，話唔定可以脫離司機生涯。不過利世民就相信真正有上進心嘅司機，一早就去咗入市價油，寧願爽手啲踏多兩轉。
至於揀B嘅朋友，恭喜你，你對經濟學有基本認識，不過對政治學就欠缺了解。又以專用氣站事件為例，供應商食得鹹魚就自然抵得渴，早就有預算亦將有關成本計算在內。營運油站最大成本之一係地價，免地價其實就差唔多可以封蝕本門。雖然原油價格升幅又真係超乎估計，油公司當然亦有能力要求政府放寬管制。響政治談判桌上一句︰「大佬！邊個當年叫我哋起呢啲氣站㗎，政府唔可以要我哋做壞規矩……我哋最壞打算可以唔開啲專用氣站，結果係點你自己諗。」專用同非專用氣站其實都係同樣幾間公司，所以供應商會唔會有好大損失呢？
次次都係利益輸送
呢條經濟學ABC答案係「D，以上皆錯」，價格管制之下消費者損失，供應商得益。對香港人嚟講，教訓就係︰第一，唔好盲目迷信價格管制。利世民從來未見過、亦未聽過成功嘅價格管制。（如果任何讀者知道，歷史上有邊次價格管制成功令消費者受惠而又冇反效果，歡迎來電賜教！）
第二個教訓就係︰政府唔好再以超筍地價，或者免地價，嚟吸引投資。石油氣只不過係小事，好似其他數碼港、迪士尼、西九龍，次次都係利益輸送，次次都係得不償失。希望香港人同政府會真係明白呢啲教訓嘅意義，阿門！
利世民