成日都有調查話香港打工仔工時長，搵得錢嚟，又顧唔到家庭生活，相信美國運通班高層都好認同呢個講法，所以出咗個非一般嘅指示，好似開會咁，最好就喺星期五下畫4點前傾完，盡量令員工可以準時收工度周末。
另外，喺7至8月暑假期間，員工周一至周四每日返多一粒鐘，咁星期五就可以休假半天，連續兩個星期咁做，就可以放足一日，等大家多啲時間陪吓仔女，真係體貼。
AE嘅人同華華講，呢兩項政策去年中開始推行，但就唔係強硬實施，同事就梗係開心，事關佢哋係美資公司，一直行緊五日工作制，家吓重可以彈性地放多幾日假，真係羨慕死人，唔知其他銀行會唔會效法呢？