今年雙春兼閏月，婚姻註冊處鬼咁好生意，地產代理界就視之為搵生意嘅好機會，所以成個月以嚟嘅騷，都係以新婚人士做話題。有冇造成社會迴響就未知，不過佢哋真係落咗好多工夫，例如美聯物業就利用佢哋掟咗好多錢搞嘅《美聯729》廣告版，刊登「囍居置業」地圖，主要係列出最有機會吸引新婚人士上車嘅二十個樓盤，大部份係新界區樓盤，唔少係二百萬元樓下。 美聯前前後後都搞咗好多張樓市地圖，下次會係咩主題呢？反彈最快樓盤？抑或係沉底最耐屋苑呢？