港股升勢再現突破，由於已連升多日，恒指在16000大關前會有阻力，但整固完成後，有機會破關而上。
2006年投資主流係中資股，人民幣今年頗大機會升值5%至7%，引發資金入市，追捧紅籌同國企，內地A股市場，亦係長線投資對象，現時港人未有途徑買A股，但可以買A股基金，估計未來一兩年會有可觀升幅。
除中資股外，科技同電子股亦可留意，納斯達克指數今年升勢便比杜指為佳，基金看好後市，個別股票尤會有強勢表現。
去年12月中上市的奕達國際（2662），到今年2月才被「發掘」出來，由2.40元升到3.20元，累積上升33%，大行同基金係買盤主力，由於其經營條件優越，競爭力強，股價相對國際同業又大為偏低，預期貨源歸邊後，股價升勢會更急。
擴產能迎接市場需求
奕達主要從事電子線路板組裝服務，係行內龍頭之一，客戶都係國際品牌，包括Toshiba、SanyoEpson、Minolta同台灣華碩電腦等。過去3個年度（6月年結），盈利都有理想增長，由03年度的4233萬元上升到05年度的1.92億元，今次上市集資逾6億元，主要係用作拓展產能，以迎接市場需求。
集團前景看好，主要係國際品牌的工序外判已成為大趨勢，而行業中能夠與奕達直接競爭的對手並不多，公司在接單方面佔有優勢，隨着在蘇州及深圳的新廠房落成後，生產能力將可提升50%，並可提供先進的倒裝晶片技術，進行0.85吋等高端電子產品硬碟驅動器的線路板組裝，亦即現時iPodnano所用的零件，公司有信心今年內可接到新產品的定單。
集團現時所有廠房都24小時運作，06年度盈利應會繼續有可觀增長，估計有3億元，每股加權盈利0.35元。07年度，新廠投產提供貢獻，盈利可再上升至3.8億元，每股盈利（全攤薄計）0.39元，預測PE12倍，1年目標價4.60元。
奕達上市價2.30元，目標價升1倍，不為過，高增長有賣點，國際同業平均PE約20倍，奕達着實偏低。
郭兆誠