舊年冬天沒有去滑雪，非常掛念雪山的景致及冰冷的空氣，於是決定農曆年後抽空去滑它一滑。北美洲嘛？路程太遠，飛的時間比滑雪的時間還要長，不合理；北海道嘛？碰巧撞正札幌雪祭，酒店與機票又貴又難Book，犯不着去跟人迫。網上搜集了一大輪資料，決定試新嘢，到東京附近的輕井沢。
成田機場直接坐NaritaExpress到東京站轉坐新幹線，可在成田機場的票務處夾啱時間買套票，價錢一樣但省了一次麻煩，如想買預約座席要事先講明，好似只係貴少少，但肯定有相連座位。一個多小時車程從機場到達東京站，下車後到另一月台轉坐往長野方向的新幹線，約一個半小時便到達輕井沢。東京市區的氣溫大約是八度，輕井沢則大約低十度八度，保持在零度左右，路邊堆滿了積雪，偶爾天上又會飄下一陣雪，專程嚟滑雪最開心見到這種天氣，今年日本普遍落大雪，滑雪夠晒厚雪。
這次旅程本擬是一次寧靜滑雪之旅，點知有老友原來比我先到埗，知道我嚟重特登留多兩日，另外有老友又知我滑雪於是後補加入，當堂變成柴娃娃老友共聚滑雪、暴食、浸溫泉之旅，日頭一齊滑雪有照應，晚上一齊食飯可以叫多幾味，臨瞓前一齊浸溫泉更加有講有笑。有雪好，有老友共聚更好。