四十四歲嘅葉蒨文（沙麗）舊年同老公林子祥（阿Lam）傳婚變，導火線係沙麗同羽毛球教練Mike交往甚密，仲一齊留喺美國三藩市幾個月，開設GGBC羽毛球俱樂部，雖然佢例牌否認傳聞，間中仲拖阿Lam出嚟晒恩愛，但沙麗經常撇甩老公，自己同啲朋友玩到半夜至捨得返歸。
兩公婆好少見
日前凌晨十二點左右，沙麗就一拖二去跑馬地消夜，同行又係冇阿Lam份。嗰晚沙麗冇化妝，一身運動look打扮，同兩名中年男子去咗跑馬地蓮園粥麵小廚打躉，其中一位係光頭男伴，另一位就戴cap帽，都係着晒運動裝，望埋就似沙麗啲羽毛球波友。
雖然緋聞男友Mike唔在場，但沙麗同兩男極好傾，傾足兩粒幾鐘，到凌晨兩點幾，個樣頗殘吓嘅沙麗至拖住腳步離開食肆，兩男就跟埋佢上七人車，由司機開車先送沙麗返司徒拔道眺馬閣寓所，再兜去銅鑼灣放低兩名男士。
關仁聽聞阿Lam平日朝早六、七點已經起身打高爾夫球，沙麗喺呢個時候仲搵緊周公，到沙麗去完街返屋企，阿Lam又瞓緊覺，睇嚟佢兩公婆雖然同一屋簷下，但見面機會多極有限。
Textby關仁
