四十四歲的金培達憑電影《伊莎貝拉》（Isabella）奪得德國柏林影展的最佳電影音樂銀熊獎，亦是香港人在國際影展所獲的第一個音樂獎項，金培達稱頒獎時先提香港才提他的名字，令他感到很驕傲。能夠凱旋而歸，不是金培達一個人的幸運，是他和香港共同的幸運。
（以下是金培達的自述）
我諗都冇諗過會喺柏林攞獎，當日彭浩翔只係好casual咁叫我去柏林，我諗住當去旅行relax吓，完全冇諗過音樂獎提名嘅問題，𠵱家諗番好彩有去到，否則上唔到台攞獎會係一個遺憾。冇諗過攞獎，係因為有關音樂嘅獎項，總覺得係外國人攞，今次攞到獎覺得好幸運亦好開心，證明香港人做嘅音樂，人哋都會留意。
彭浩翔好執着
我同彭浩翔合作過好多次，《星願》攞獎之後，我曾經放風出去話願意幫一啲新導演免費做電影音樂，佢就嚟搵我，第一次合作係《買兇拍人》。之前合作嘅幾套戲，我都係減價幫佢做，今次拍《伊莎貝拉》，佢話終於可以計足酬勞畀我，但佢又冇預到用真樂器演奏嘅錢，我話咁喺我嘅人工度減啲啦，而嗰隻葡萄牙文嘅主題曲《Ogentedaminhaterra》嘅版權費，佢又冇預到budget，我話咁我再減啲，你又再喺第二度班錢過嚟。
我同彭浩翔做嘢幾夾，一首歌版權費六位數字，唔可以話貴，但冇預呢筆錢就覺得貴，用第二隻平啲嘅得唔得呢？彭浩翔係一個好認真嘅導演，佢執着起上嚟都幾得人驚，佢支持我用呢隻歌。不過計起上嚟，我呢套戲嘅酬勞都唔夠呢隻歌貴。
《如果．愛》入圍今年香港電影金像獎嘅最佳電影原創音樂，我當然想攞獎啦，但攞獎呢樣嘢好難講，好似陳光榮做嘅三集《無間道》音樂都做得好好，我好鍾意，但第一集輸咗畀《英雄》，第二、三集都攞唔到，畀我嘅《忘不了》攞咗，我自己攞梗係開心啦，但我覺得佢應該攞，有啲替佢不值。
瓣數廣乜都做
我唔想用藝術或者商業去形容自己嘅音樂，我亦唔太敢話自己係藝術人，可以講我係多元化嘅音樂人，對音樂嘅接受程度同態度都比較open，無論係classic抑或流行曲都鍾意。喺香港做音樂條路係艱難嘅，但我又未試過話去到聽日冇飯開嘅程度，輕微捱日子就試過，我試過有一段時間不停咁將樂曲變番五線譜，我唔係話做呢啲係低等啲，不過唔係我想做嘅嘢，但我要生存，要生活，當時嘅我，一般人嘅形容就係窮。
四十幾歲人重係單身，哈哈，你係咪會用鑽石王老五形容我？我嘅工作日夜顛倒，社交活動自然會少啲。拍拖結婚呢啲嘢順其自然啦，我唔係刻意要自己一個人，我都enjoy有family嘅生活嘅，咁又唔係話恨得好緊要好悽慘嗰隻。我係一個基督徒，搵基督徒做對象唔係一個規條，但係好自然嘅事，如果另一半同自己睇嘅事物唔同，自然會唔夾。
口述：金培達 撰文：張止寒 攝影：何國豪
