食環處：摸完億年岩石食免費醉蝦

我係個百分百城市人，朝十晚八晚晚OT，今日放假瞓到日上三竿，發夢返番2億萬年前嘅香港，自己仲變咗野人喺岸邊摸蟹捉魚㖭……發夢無咁早？唔使好早㗎咋，只要你學我咁，下晝三點幾踩入大埔三門仔，行一趟馬屎洲，就可以睇到香港有2億萬年歷史嘅最古老岩石，摸蟹捉魚？唔使勞煩你，隔籬就有勁正海鮮慢慢歎，仲有免費醉蝦食㖭……仲講？行人喇！

記者：李智聰　攝影：陳陶鈞
模特兒：PC、Carrie（Salvador）

■香港最古老沉積岩，有2億8千幾萬年歷史，唔只睇到仲可以摸到，形成於二疊紀，比暴龍玩晒嘅侏羅紀年代仲要大成億歲。

■從摺曲嘅岩石，你可以感受到大自然力量嘅厲害，堅硬嘅岩石受到大自然壓力一樣會屈服。

■岩石上沉積物不斷俾海水帶走，最後一條條高抗蝕性岩石橫瞓海灘，一邊向海一邊向山，好似猛龍入水。

■起點有路標同涼亭，唞夠再綑島邊行，出發！

■記得帶相機上山，因為個View超正。

綑邊上山2個鐘搞掂

今日呢個旅程最啱又懶又想行吓山食番餐嘅朋友，大埔墟火車站搭10分鐘小巴直達三門仔，再轉搭5分鐘舢舨就可以登陸馬屎洲。馬屎洲係個孤島，島上無馬屎，不過有好多有研究價值嘅古老岩石同獨特生態環境，所以俾政府規劃為「特別地區」，沿途有傳意牌介紹地理環境同岩石資料，計計數有成2億8千幾萬年歷史，重珍貴過侏羅紀，值得睇吓啦！聽講地質學家仲喺度掘出唔少瓣鰓類動物、腕足動物化石同菊石，包你學到嘢。
我都係懶人，不過敢寫包單呢個島仔一啲都唔難行，個半鐘頭沿島綑邊行，近睇有「最古老嘅沉積岩」、「芝士形岩石──石英」、「龍形化石──龍落水」、「以為有金執──愚人金」。睇石嫌悶？仲有選擇啫，上山囉，上到最高點可飽覽吐露港、馬鞍山等景色，淨係望到船灣淡水湖條主壩都已經夠壯觀喇，腳程快全程2小時完成，行完山睇完石，扯夠新鮮空氣Call舢舨飛返三門仔擦海鮮，呢日假期──無嘥！

■沿途有傳意牌，介紹各景點及岩石特徵。

食海鮮送醉蝦

去到三門仔，「三門仔漁港」幾乎獨市咁滯，話明海鮮梗係海鮮價，我唔敢講「三門仔漁港」超平，但至少無話開天索價，總經理曾先生話：「我哋周不時都試出新菜，獨創菜式有過百種，仲不時搞吓Promote，呢期搞緊免費京川太白醉蝦。」免費？即係點呀，即係有幫襯有得送，每枱送一碟。我就行咗大半Day，肚仔餓，所以覺得海膽帶子焗飯最好味，香唔在講，最緊要有飯到肚吖嘛。