家真係好似西片主導，難得今個星期連續兩套港產大片《情義我心知》、《無極》同告落場；《無》擺明大卡士大製作，好難忍手唔買；《情》就有《無間道》至強幕後班底力撐，再加儍強及黎明喪玩弱智中年，踩過歌舞伎町做「鴨王組合」，全片差唔多由頭笑到落尾！兩套都值得大家畀錢買嚟撐吓！
記者、攝影：朱崇德
《情義我心知》同《無極》都係剛過聖誕檔嘅戲，今次落到DVD都重要再鬥一番！《無》在國內票房幾勁吓，不過嚟到香港表現就較一般，票房收入一千萬都唔夠；反而《情》就以小成本小品製作，贏得相當唔錯票房。不過再睇番今次DVD銷碟情況，形勢有啲逆轉；開賣咗幾日，旺角區嘅去碟情況大概係10:1，《無》贏《情》幾條街，「問現場觀眾」，佢哋嘅心態係一來知佢大製作，戲院未睇要「補飛」！再者大嗱嗱成百蚊一套片，買大製作梗係抵啲啦！聽到呢度，唔知點解硬係覺得香港戲迷好似有啲邏輯上嘅問題！
東京鴨王上位故事
呢個鐵三角無敵幕後班底，大家喺《無間道》同《頭文字D》都見識過佢哋嘅威力，不過Making唔提都無發覺，原來佢哋工作嚟咗個大執位，以麥兆輝、莊文強為首，作導演加編劇，劉偉強則完全退守作純監製工作；以佢哋嘅諗法，係希望「洗洗牌」為自己帶來一點新衝擊；老實講，經《無間道》嘅巔峯後，出現創作上的瓶頸實是在所難免，幸好今次《情》總算帶到一份新的感覺畀觀眾。
電影基本係兩個男人「情與義」的故事，話說黎明係一個患有輕度智障的低B仔，一次意外竟流落日本；杜汶澤則是借到一屁股債的新宿街頭蠱惑仔，原意只是想打黎明荷包，但竟俾黎發現大家係失散多年的「老同學」，而且重打蛇隨棍上暫居佢屋企，真係唔知邊個先至係儍仔；後債主臨門，逼於生活只好去做「鴨」，但意外發現低B黎明，以一片純真再加一招攬攬，竟然有極強冧女能力，而且重俾佢火速上位成全歌舞伎町，OL、怨婦間最搶手的「鴨王」！
接客戲份樂而不淫
以《情》這類題材，如以一貫港產片的作風，實難走出淫賤加搞笑、胡鬧加煽情嘅表達手法；難得處是《情》拍得樂而不淫，好多床戲都係點到即止，感覺是比《金雞》掌握得更有分寸，所以評級只作IIB真係不無原因；好笑必睇位，主要由杜要訓練黎「做鴨」開始，學日文、扮韓國仔、吹氣瑪莉學床笫功夫，都係極盡搞笑之能事，中間重間夾雜着兩個大男人，開始互相信賴、互相依靠的感情發展，雖有少許做作，但不算惹人反感；不過當中最爆者，係黎以儍憨憨嘅表情，再加劉華笑面迎人嘅親切服務態度，去硬啃「皮鞭」豬扒、80幾歲阿婆，同張耀揚友情客串嘅古怪嫖客，有時真係想叫導演唔好咁快閂埋門，畀多幾Shot我哋睇！
必睇Bonus：齋睇幕後人語
全個Bonus真係只得一個Making睇！大家總唔會對預告片同文字檔案有興趣啩！幕後三巨頭同戲中兩個男角都會亮相，睇得最過癮係黎明原來好多扮儍仔的鏡頭，竟然係莊文強預演一次畀佢照做，相當笑爆！導演們亦大讚杜的演技收放自如了，今次夥拍表現現平平嘅黎明，都可以有「夾」嘅感覺，好明顯有就住對手嚟演嘅成長，好期待儍強以後會有更好嘅演出！
價錢：$70
區碼：3區
發行：寰亞電影
聲效：dts5.1、AC-35.1
字幕：繁簡體中文、英文
3億4千萬打造愛情神話
另一套《無極》則以3億4千萬加3年時間，打造極其壯闊的電影場面，再加港、日、韓多地影星落力演出，華語片界真係好耐冇咁嘅大製作！
要明白電影主題，就先要明白戲名的點題，所謂「太極生兩儀，兩儀生四象……然後萬物生」，但既名「無極」又何來兩儀，兩儀本就代表了人世間的陰、陽，陰陽失衡，戲中的男女情感本就注定了失敗收場！
故事主要講在這個「無極」的世界，一切都盡在滿神的制約中；話說長勝將軍真田廣之、奴隸張東健及只懂肆意破壞的謝霆鋒，竟同時愛上傾國傾城的張栢芝，可惜她是一個永遠不懂去愛、不能得到真愛的女人，所以戲中的男主角無論以欺騙嘅手段、動之以情嘅真心，還是用上最狠辣的手段，到最後都只能是空着雙手失望而回。
華語製作 罕見千軍萬馬
電影一開場，係華語片中罕見的拍出壯闊瑰麗！千軍萬馬中、花甲紅衣將軍，力敵千頭蠻牛、萬名蠻人，真係睇得人熱血沸騰！但現實真的有長勝將軍嗎？這可是真田廣之最後的一場勝仗，往後一切，都已在陰險的無歡公爵──霆鋒的盤算之中；身為奴隸的張東健，一直為長勝將軍出生入死，後來竟發現自己竟是被滅族的雪國最後遺民身份，他要站起身，為死去的國人討回一個公道；可惜這一切早已在滿神的掌握之中，以一塊僅可果腹的燒餅，與之定下一生不能得到真愛的契約，並將三個風雲人物的生命連成一線，並推至互相傾軋的苦難之中！老實講，如果以單純的戰爭或武俠片看待，難免在戲院中會感到失望而回！
必睇Bonus：多地明星合作趣事多
DVD分限量版同普通版，兩者都有孖碟，Bonus重有成150分鐘額外收錄，都叫有交代；限量版主要係多咗日本插畫師正子公也的衣飾設計手稿集同4張Postcard，相差少少錢都算值得。Bonus必睇位係多地明星、導演陳凱歌及攝影大師鮑德熹嘅訪問，跨國界嘅合作中，真係好多趣事，幾好睇吓；另睇完製作特輯後，大家會進一步明白電影拍攝的難度，大家會更明白這百零蚊DVD抵買之處。
區碼：3區
發行：得利影視
聲效：DTS-ES6.1、DD6.1、DD5.1、DD2.0
字幕：中文、英文
