1.林慕德（音樂人）
九十年代初返嚟香港，我係做教會音樂，後來轉咗做freelance，到林慕德嘅立樂製作公司做先開始有月薪，月薪當時對我嚟講太緊要，有固定收入之後可以儲啲錢，儲到錢就用嚟買keybroad等器材。當時我對自己音樂事業條路好模糊，但林慕德畀咗個option我睇，原來做音樂係可以有咁嘅模式。
2.雷宇揚（藝人）
我同佢完全係兩個世界嘅人，我哋有一樣嘢好夾，大家都係電影迷，瘋狂咁鍾意電影，一次佢參與咗一套電影嘅策劃，介紹咗老闆畀我識，令到我參加咗第一套嘅電影配樂工作，套戲叫《孽戀》（95年），葉芳華主演嘅。
3.趙增熹（音樂人）
我同趙增熹原本唔熟，好奇怪佢做《嫲嫲帆帆》（96年、圖）電影配樂嘅時候，話搵埋我一齊做，重同我sharecredit，呢套係我第二套做電影配樂，亦係因為佢，我識咗許愿，之後許愿做咗我經理人。
4.許愿（音樂監製）
許愿做咗我經理人之後，幫我接咗《EU衝鋒隊之怒火街頭》（96年）做配樂，亦係呢套戲令人開始留意乜有個咁嘅人，可以將動作片嘅音樂做到咁，有人睇得出我好認真咁做音樂。監製陳錫康都話覺得幾好，後來我哋亦合作咗唔少次，之後我又識咗馬楚成、陳德森。
5.陳少琪（填詞人）
佢嘅天分好高，而且分析能力又快又強，好透徹，當年我想賣歌，做咗demo之後，佢都畀咗啲意見我，當時佢已經好出名，但我都覺得佢好樂意畀意見我，𠵱家我唔少歌都係搵佢填詞，我同佢好傾得埋，好多時佢都畀到一啲諗法我，對我幫助好大。
後記：背後的女人
金媽媽（左）向記者表示恨飲新抱茶，並歎息說：「佢又唔係生得醜樣，點解連女朋友都冇？佢做起嘢嚟日夜顛倒，有時我都幾日見唔到佢，邊個女仔會頂得順呀。」金媽媽透露大多數的節日，兒子都會找她一起吃飯，記者指若金培達連情人節亦陪她，應確實沒有女友。金媽媽想了想說：「今年情人節佢咪喺柏林咯，上年……佢上年係同我食㗎。」
