呢排大陸地產股同早排相比，確係冇咁好炒。不過，昨日有證券行出報告調高中國海外（688）目標價，股價即刻彈升7.36％，以全日最高位4.375元收市，成交有成4251萬股，金額1.81億銀。
經紀黃話，大陸地產股累積升幅唔細，但唔係完全冇得炒。早排搞過批股嘅中新集團（563），批完股之後跌破批股價，雖然之後再冇乜聲氣，但就應該未炒完。中新當時搞批股，貨源好大部份落在對沖基金手上，之後佢哋仲一直喺市場密密增持，其中兩個基金，一個持股量7％，另外一個亦揸6％，基金揸得咁重貨，必然係好有信心，中新唔會冇後着。
中新上次以每股0.89元，以先舊後新方式配售4.97億股，然後另外一位主要股東，即以相同價錢減持2億股。中新昨日微升1.25％，收0.81元，成交股數2589萬股，金額2109萬元。
慕容小初