皇儲查理斯呢鋪真唔好彩，本來想禁制啲英國報紙侵犯佢嘅私隱係咁爆料，點知最後本日記簿嘅內容竟然公諸於世，八方先知原來呢位多情皇儲咁反共同情真，當日佢嚟香港出席主權移交之後百感交集，在風雨的七月、落旗歸國時，竟然擔心香港會淪為貪污之都，法治不保。
坐監機會唔係冇
早知佢咁為香港人着想，就俾個末代港督佢做吓，可能佢比肥彭更勇，同北京死過，最後要改寫香港變成最大中國外賣（TheGreatChineseTakeway）嘅命運，為大英帝國保住最後一塊識生金蛋嘅殖民地。
而最令香港民主派感到出奇嘅，係多情皇儲最擔心係白鴿黨黨魁嘅馬丁李會被共產黨拘捕，其實當時連馬丁自己都驚，佢同八方講，所有外國記者都問同一條問題，佢嘅答案係「被捕坐監嘅機會好微，但係唔係冇，咁諗太天真。」
皇儲對馬丁咁有印象，因為當日佢喺大不列顛號上，曾經單獨接見馬丁，兩人傾咗十幾分鐘，馬丁將佢擔心嘅事講咗俾皇儲知，結果查理斯寫低晒係本日記上，包括怕解放軍會四出擾民，法治會被破壞。
回歸八年，事實證明駐港部隊仲比英軍守規矩，但係馬丁話冇人諗過中聯辦乜都插手，連香港大大小小嘅選舉都要控制，要對抗京人治港，唯一方法係爭取民主，為此佢都怕自己未來十年有機會坐監，所以皇儲擔心唔係多餘嘅。
九七嘅時候，真係人心惶惶，因為共產黨個底認真差，不但視人民如草芥，而且乜都敢做，搞到你鬥我，我鬥你，乜嘢尊嚴都冇晒。華叔當年喺加拿大訪問就曾經感觸落淚，驚九七後唔可以再自由外出，否則就會流放，唔准回港，好彩皇儲同華叔嘅擔心冇出現。華叔同八方講，佢做人永遠乜都作最壞準備，最好希望，對於皇儲嘅心情，佢冇興趣知道，只係見到香港人回歸後呢幾年好爭氣，冇令香港倒退，好似反23條同否決政改方案，都全賴大家同心協力。
咁又係，唔通靠英國佬咩。
傳真︰2623-9278
電郵︰[email protected]