電子傳媒報道股市行情，你估用得最多係乜嘢字？有心水清者計過，最多用嘅係「窄幅波動」。昨日港股「窄幅波動」，恒指高低95點，埋單升43點。
滙控（005）收131.80元，升1.30元，帶起恒指46點，即係包起晒恒指全部升幅，仲凸少少。滙控有型，點炒滙控C輪，下周一再講。
中電C輪4733：中電（002）冇乜郁，跌斗零，收44元。但隻C輪9714，則由1.5仙飛上3.4仙，升幅1.27倍，有半球成交。隻輪5月初夠鐘，行使價45.70元，溢價4.6%，隻輪去到尾，冇渣多過有渣。
要博，揀4733好過，6月初到期，輪價18.3仙，溢價1.6%，槓桿率24倍（有效14.1倍），引伸波幅18%。不過，數據雖靚，減電費問題困擾，正股冇氣，睇人㩒上㩒落好過自己炒。
新地C輪9435：新地（016）升35仙，C輪9338由5.6仙升上8.6仙，升54%，上龍虎榜。隻輪5月中到期，行使價88元，新地做緊80.90元，隻輪到尾作廢多過唔作廢。
玩新地C輪，正路係9435，5月初到期，輪價35.5仙，溢價3.2%，槓桿率23.4倍（有效12.9倍），引伸波幅22.9%。
金朝陽公司輪2311：2311喺死火榜上排頭位，收1.9仙，散53%，輪價同冇得剩冇乜分別。2311下周一最後交易，行使價2元，正股（878）收1.98元，隻輪就快係咁先。要博，直接買正股算數。
章盛