陳少寶（小寶）：曾是商台名DJ，先後擔任新藝寶、寶麗金唱片公司高層，一手捧紅王菲、Beyond，並曾和張國榮、許冠傑等巨星合作，九九年加入環球唱片任總裁，○三年離開，現為陳苑淇經理人。
我返咗環球之後，好多行內人話我淨係識得做老鬼，唔識做新人，我聽過栢芝唱歌，冇問題，我覺得佢唱得唔差。我簽佢時佢只得十八、九歲，栢芝已經非常之世界女，證明佢流住咁嘅血，佢生出嚟就係做戲嘅人。
栢芝第一隻碟係奇迹嚟，好爆，一個連廣東歌都未算唱得好嘅歌星，走去唱咗隻國語歌《星語心願》，咁就成為咗佢最勁嘅一首歌，連大陸啲人識栢芝都係因為呢首歌，呢首歌畀到我好大嘅鼓勵。
「《星語心願》最紅」
嗰陣栢芝開完套戲《星願》，電影公司話要兩首主題曲，一隻國語，一隻廣東話，國語版係高雪嵐（傅佩嘉）寫嘅歌詞，當時佢都喺我公司旗下，電影公司一聽完，話國語版好perfect，乜嘢廣東版都唔使再攞嚟，當時公司成個宣傳部都好震驚，公司入面好多意見，覺得唱國語歌會唔得，嗌晒交，最後我哋決定唔打（宣傳）呢首歌，跟套戲，得就得，估唔到呢隻歌就成為咗栢芝到𠵱家為止最紅嘅歌。
啲人話栢芝鵝公喉，其實鵝公喉先有音域，唱歌要有高音低音，我記得有一次做電台訪問，我講咗句「偶像歌手邊識唱歌」，第二日啲報道話我插自己友，佢經理人公司打電話嚟，叫我唔好咁講嘢。講真我簽得嘅歌星十個有九個都識唱歌，有冇時間練係另一件事，但不能懷疑我，我覺得栢芝係有條件唱得好嘅。
「記者會有你冇我」
有一排栢芝好嬲我，可能覺得我亂咁講嘢啩，佢喺台灣出佢嘅第一隻國語碟時，同台灣唱片公司嘅總經理講話唔想小寶去佢嘅記者會，如果小寶出現嘅話，佢分分鐘會唔出現，結果我都有去到記者會，但係等熄燈之後先入場，個記者會做得幾好，不過栢芝嗰日畫咗條好粗嘅一字眉，公司唔係咁鍾意，因為台灣嗰邊唔係好受呢形象。
栢芝無心唱歌，呢樣嘢係真嘅，因為靠唱歌賺嘅錢太少嘞，又起碼要浸幾年先可以喺紅館整番場，因為栢芝要供養太多人，佢需要搵快錢，佢係一個好女仔嚟，好照顧屋企，但佢一日得廿四小時，佢可以做嘅嘢係盡量拍戲。
「同霆鋒係天仙配」
你唔好以為我係踩栢芝，我係讚佢唔係貶佢，邊個唔使搵食先？我係同栢芝冇乜兩句，但我覺得佢係嘥咗嘅，佢同霆鋒都係嘥咗，我從來未試過見過明星好似栢芝同霆鋒咁，一出嚟就咁紅，亦因為咁，佢兩個都唔識得珍惜，佢兩個真係天生一對，係天仙配，經歷幾乎一模一樣，如果栢芝係男人，佢就係霆鋒，霆鋒係女人就係栢芝。
口述：陳少寶 撰文：張止寒
