男人，實牙實齒埋身一激最實際；女人，最愛浪漫，心靈慰藉可能已經好足夠。男同商店賣嘅以寫真、漫畫、「玩具」為主，官能刺激行先，但女同商店，就以小說、戲劇最多，最激那件也只不過是震蛋。這個情況，其實就同男女戀愛世界一樣，連男同店店主Dicky亦咁講：「男人一向都係比較着重性，識咗無耐就可以返屋企，女人比較含蓄，喜愛心靈溝通，其實在同志世界也一樣！」
記者：馬慶武
攝影：陳偉強、陳智良
Model：權、羅
男同商店─七成同性有關
現世代同性戀愈來愈公開，所以同志店才有生意可做？錯喇，原來15年前，就算性商店都唔多公開嘅時候，南極星已經開始做男同志生意。店主Ricky絕無避忌：「係呀，我係同性戀者，我相信一定要係同志一分子，先可以明白同志有咩需要。開設男同商店，全因為當時沒有見過同類商店，當時其實都有一定數目同性戀者，不過可能15年前偷偷摸摸，𠵱家就蒲晒頭，公開都唔怕。」店內售賣嘅貨品，有七成同性有關，就算小說都以情慾內容為主，只有小量正正經經研究同性戀嘅書籍，簡單講句，都係男人鹹濕啲。「我哋嘅客人大多數都超過25歲，都係同一般男女一樣，到了這個年齡，就會識得享受性。」Ricky更話男同志世界，對性嘅態度一樣係愈趨開放：「你睇啲寫真就知喇，以前王喜露吓股已經令同志界『𠵱嘩鬼叫』，𠵱家啲外國雜誌連封面都咁激，但係大部份人買嘅時候都唔會點尷尬，重試過有女性幫襯㖭！」激，因為太激，影咗都唔出得街！要體驗激烈程度，請親自參觀，不過大多商品只限成年人選購，若你未滿18歲已經知道自己係攣嘅，暫時未幫到你嘞……
男同小說$49-$60
雖然有啲小說齋睇書名未必知係同性戀小說，但小說內容以情慾為主，而且耐不耐有幅刺激插圖。
台灣同志旅遊書$140
台灣作家撰寫嘅旅遊台灣嘅指南，主要介紹同志蒲點，包括酒吧、商店、餐廳，正確嚟講係台灣指「男」。
TheJoyofGaySex$200
台灣性博士著作，內容以學術角度研究同性戀，係店內少有較正經嘅書籍，但同樣屬18禁。
美國漫畫$49
咪睇個封面扮KingKong懶搞笑，其實內容超激，筆下人物毫無保留。
低腰泳褲$150-$250
呢兩個牌子喺香港都有得賣，但老闆專程由台灣入貨，因為呢啲款較高衩較低腰，性感！蒲南灣必備！
南極星（28382913）
地址：銅鑼灣軒尼詩道438號金鵝商業中心11樓A
「直男」點睇男同書？
女同商店─多談情少說性
女同商店嘅老闆Kanix一睇就知係女同志，爽快、夠Man。「得，影嘢介紹得，但我間舖唔俾男人入，如果有客你哋要出一出去。」Kanix事先聲明，但原來女同志並不介意，拍攝時有一群女學生入嚟買「束胸」背心，筆者同攝影師即時停手準備迴避，誰知女學生們一句：「哦，我哋唔Mind。」我哋繼續影相，佢哋繼續買嘢。唔Mind，可能因為店內賣嘅唔算露骨，大多數係嚟自台灣嘅小說，亦有有關女性戀嘅DVD，連同小說，大多數都唔係3級，談情多過講性。另外就係大量代表同性戀嘅彩虹飾物，好多嚟自台灣。「我喺台灣已經有4間舖，喺澳洲讀完書返嚟，有一次去台灣去過同志界出晒名嘅台灣『晶晶書店』（全店只賣同性戀書籍、產品），覺得香港都應該有，所以開咗呢間舖。」Kanix話香港同志態度開放，但比起台灣就程度不及：「所以台灣舖生意更好，不過畀啲時間我，我有信心T-Studio愈開愈多、愈開愈大！」
束胸背心$450
唔係避彈衣，而係女同志隱藏女性性徵嘅束胸背心，平胸闊衫褲，係女同「男方」嘅最愛打扮。
震蛋$78
店內最激產品──震蛋，銷售對象主要係女性，所以設計都係Cutie為主，公仔唔除帽都估唔到係咩。
《月亮的騷動》
（需預訂，價錢未定）
台灣女同小說作者祐希嘅成名作，呢本重有作者嘅親筆簽名，店主最愛珍藏。
《打開心門向藍天》$70
由台灣入口，Kanix夠膽講句全港獨家發售，同樣係女同愛情片。
《好郁》DVD$50
店主最愛同性戀港產電影，Kanix仲話一般人睇可能覺得好深，但只要係女同性戀者，一睇就明。
攣的標記—6色彩虹旗
彩虹七隻色，但代表同性戀的彩虹旗只有六隻色。典故源於78年三藩市同志大遊行，當年設計師GilbertBaker希望設計一面彩虹旗來做遊行的標記，選擇了彩虹（粉紅、深紅、橙紅、黃、綠、藍、靛、紫）8種色，分別代表性愛、生命、復原、陽光、自然、藝術、和諧及精神。因印刷技術，出現時只剩7色，79年遊行委員會想將旗幟上嘅顏色平均分布喺遊行路線左右兩旁，於是放棄咗不太起眼嘅靛色。從此，紅色在頂部嘅6色彩虹旗就成為同志運動嘅象徵。
T-Studio
地址：銅鑼灣銀座商場地庫28號舖
www.T-STUDIO.info
