何謂開明僱主呢？普羅打工仔嘅諗法，可能係賞罰嚴明，講得出做得到嘅老板。至於明愛樂務綜合職業訓練中心所下嘅註腳，就係支持平等就業機會，肯幫助弱勢社群嘅僱主。美聯物業啱啱得到該機構頒發「開明僱主」嘉許狀，感謝美聯畀佢哋中心學員有個工作機會，令佢哋可以獨立，而且有尊嚴咁靠自己生活。
美聯喺過去兩年嘅物業推廣展銷活動上，都聘用咗呢間訓練中心嘅學員做臨時工，負責派吓傳單。美聯仲話，因為見佢哋派傳單派得盡心盡力，態度又夠認真，以後會陸續有嚟；美聯仲希望能提供更多工作機會畀佢哋，盡展企業嘅社會責任，將平等的訊息傳送到社會上各個層面喎！
今次「開明僱主」嘉許禮係明愛樂務綜合職業訓練中心第一次搞，獲嘉許嘅機構有十六間，包括多個政府及相關機構、學校同私人企業。
電郵地址：[email protected]