影評人方俊傑看罷《斷背山》話，其實我們人人都有個斷背山，只要情感真摰，無論你係攣係直，總有身同感受的地方吧。可幸，今日像《斷背山》般的壓抑苦戀相信不多，也合該絕迹；反而，前人種樹，後人乘涼，昔日一座座的斷背山，歷經時代及觀念的變遷，終於可以大情大性公開地表達攣到爆，縱然依舊笑中有淚，總比終生躲在衣櫃不見天日好得多。
記者：吳小明
攝影：周旭文、部份圖片由WTheatre提供
HappyGay
憑《攣到爆》一劇奪得舞台界最高榮譽，梁祖堯（阿祖）成為05年度香港舞台劇獎最佳男主角，這套講「香港基佬嘅愛與哀愁」的棟篤笑Camp到爆懷舊喜劇，阿祖除了演出外，亦有份合導，劇本每一句對白、每一段感情均有出處，全部是導演黃智龍（小龍）和阿祖根據個人及身邊朋友的真實經歷出發寫成，雖然阿祖沒有明言指出哪些是自己的經歷、哪些屬於身邊朋友，但也不諱言說，觀眾都一一當成了他的個人寫照。
Gayder測試
要講基佬的愛情故事，少不了要講如何探測對方是直（異性戀者）定攣（同性戀者）。小龍說：「直嘅男人看另一個陌生男人嘅目光只有兩種：友善或不友善；但攣嘅目光就絕對複雜得多，簡單啲講就係兩個字：曖昧。眼神中會帶着多種心情：佢係咪基嘅呢？如果係又點、唔係又點？當中有好多盤算七上八落，但直佬根本唔會咁樣打量另一個男人。」當中的錯摸及笑話就由此而生。
同志三段愛
阿祖話，劇中主線描述的三段愛情故事，由最初的PuppyLove、至愛上靚仔花心壞男人，再到人長大一點，找到一個心靈溝通得到的Soulmate，其實都係大部份人無分攣直的愛情經驗，用上如此典型的故事橋段，無非是希望大家容易引起共鳴，也帶出除了戀愛對象的性別有異，情感的真摯其實並無兩樣。「不過，其實男人愛男人係咪真係同男人愛女人無分別呢，又唔係喎，像劇中最重要嘅第三段感情，男主角嘅Partner入咗醫院，因為對方家人不諒解，根本無辦法親自到醫院去探佢，反而由頭到尾都只能像局外人咁喺外圍打聽病情，呢啲具體處境，喺異性戀嘅世界好難發生。」
獨愛大隻佬
既然講得出全劇是基佬愛情故事的真實寫照，也會有桑拿浴室中覓食釣魚的情節，小龍說，雖然係好Typical、也有點政治不正確，但到底的確是某些同志生活的一部份。阿祖補充：「有一Part講主角疑心靚仔花心情人有外遇，仲要係『KingKongBarbie』嗰類型，即係大隻得嚟又Camp嗰種；果然情人搞生日派對時，請嘅全部清一色都係『KingKongBarbie』，雖然咁寫都幾衰，但都係事實。」
雙面生活
談到同志跟家人的關係，Joey說，雖然自己憑這套劇攞獎，屋企人又支持他的一切，但其實自己只是幸福的少數。「唔少睇完呢套劇嘅朋友會Email同我講，依然唔敢同屋企人剖白自己嘅性取向，就算喺朋友面前ComeOut無問題，面對屋企人都仲係要扮鍾意女仔，喺Office又要同其他男同事一齊講女，過住雙面人嘅生活，連封Email都要匿名先敢寄出；所以戲中基媽由最初知道自己個仔係基嘅，寧願減壽十年都希望個仔變番直，到後來接納咗兒子嘅性取向，都不外想講鍾意男人定女人是個人嘅事，但一個人生活喺社會中唔純然是個人的，現實，有時就係咁無奈。」
最愛女藝人
阿祖最喜歡的演藝人不論中外，統統都是女性，其實也非意料之外，如林憶蓮一向都是同志至愛，據說是因為她唱盡愛情的悲酸苦澀，同志深有共鳴；阿祖就說他愛這5位女藝人全部都有一個共通點，就是情感演繹得真摯，但又渾然天成，完全無工匠雕琢之氣，也期望自己的演技能夠到達這種境界。
60年代攣人悲劇
《斷背山》改編自美國女作家安妮普露（AnnieProuolx）短篇小說集《CloseRange》其中一個故事，講述60年代跨越懷俄明與德州的愛情史詩，兩個牛仔在山中牧場工作，日夕相對擦出愛火花。其後兩人回到城市，世俗壓力下各自結婚生子，但每隔一段時間便會偷偷相聚，關係維持二十多年，直到其中一個突然意外身亡，另一個才醒悟對方是自己畢生最愛。
《攣到爆》3月17日至26日於藝術中心壽臣劇院公演。
查詢：91009341
