禽流感殺到埋身，唔到特區政府唔驚，周一嶽同尤太係負責官員，當然最為緊張，八方有日問尤太，點解咁冇人情味要市民立即交出心愛嘅雞鵝鴨，又一毫子都唔賠。尤太都有啲歉意，只係市民健康大敵於前，唔敢怠慢，「其實沙頭角嗰位市民冇事，應該還得神落！」
尤太喺新正頭急急請老細回港，又叫法律草擬專員拍檔，趕起法例唔准人喺後園散養雞，本來出發點係好，但係執行就真係過急，八方頭腦古舊，總係覺得政府唔可以就咁要人交出生蛋工具或者係寵物，連利是冇封，生果都冇籃，實在於禮不合，如果因怕市民連夜走私雞博賠償，更係欠缺互信，結果搞到一向親政府嘅發叔都要尋求司法覆核，真冇癮。
當然𠵱家講乜都太遲，好彩政府最後都從善如流，噚日話會考慮放寬市民飼養家禽寵物。唔講唔知，尤太細路女時屋企都有養雞仔，佢朝朝起身第一件事就去睇吓佢哋，所以都好明白市民難捨嘅心情。
傳真︰2623-9278
電郵︰[email protected]